Harta “vrasёse” zbulon se si raketat e Iranit për Ditën e Gjykimit mund të godasin edhe Evropën, pasi Teherani ndërtoi fshehurazi nёpёr fabrika nёntokёsore një arsenal gjigand prej 300,000 raketash.
Harta e publikuar nga mediat britanike nxjerr në pah shtrirjen e frikshme të arsenalit raketor të Iranit, duke treguar se raketat balistike të Teheranit nuk përbëjnë më vetëm një kërcënim rajonal, por potencialisht arrijnë deri në Evropë – përfshirë edhe Ballkanin.
Konflikti i përshkallëzuar në Lindjen e Mesme ka rikthyer në qendër të vëmendjes kapacitetet ushtarake të republikës islamike, sidomos pas paralajmërimeve të presidentit amerikan Donald Trump për një “valë të madhe” goditjesh kundër infrastrukturës iraniane.
Analistët e mbrojtjes theksojnë se Irani ka investuar për dekada në zhvillimin e raketave me rreze të gjatë veprimi, si alternativë ndaj mungesës së një force ajrore moderne. Mes tyre përmenden Shahab-3, me rreze rreth 1,300 kilometra, si dhe Khorramshahr, që mund të arrijë deri në 3,000 kilometra. Kjo do të thotë se objektiva në Evropën Juglindore dhe Lindore – përfshirë Greqinë, Rumaninë, Hungarinë dhe potencialisht Shqipërinë – bien brenda rrezes teorike të goditjes.
Frika për këtë shtrirje u shtua pasi një dron iranian goditi një bazë britanike të RAF-it në Qipro, duke ngritur pikëpyetje mbi sigurinë e instalimeve ushtarake perëndimore në rajon. Sipas ekspertëve, Irani tashmë ka kapacitet jo vetëm për të goditur objektiva në Lindjen e Mesme, por edhe për të shtrirë ndikimin e tij përtej rajonit.
Strategjia e Teheranit është cilësuar si “luftë asimetrike”: në vend që të konkurrojë drejtpërdrejt me flotat ajrore dhe detare të Perëndimit, Irani ka ndërtuar një rrjet të gjerë raketash balistike, dronësh vetëvrasës dhe bazash të fshehta nëntokësore. Programi bërthamor dhe objektet e tij të mbrojtura thellë nën tokë janë aktualisht në shënjestër të sulmeve të SHBA-së dhe Izraelit.
Përveç raketave, Irani ka zhvilluar edhe dronët Shahed, me rreze deri në 2,000 kilometra. Këta dronë, më të ngadaltë se raketat, por shumë më të lirë dhe të prodhueshëm në numër të madh, mund të përdoren në valë të njëpasnjëshme për të lodhur sistemet e mbrojtjes ajrore. Teknologjia e tyre është përdorur edhe nga Rusia në luftën në Ukrainë, çka tregon nivelin e sofistikimit të industrisë ushtarake iraniane.
Sipas ekspertëve, Perëndimi ka nënvlerësuar për vite me radhë përmasën e këtij kërcënimi. Investimet masive të Iranit në raketa dhe objekte nëntokësore tregojnë një strategji afatgjatë për të krijuar një “perandori raketash” që shtrihet përtej kufijve të rajonit.
Ndërsa lufta vijon dhe tensionet rriten, harta e re e rrezes së goditjes shërben si një paralajmërim i qartë: infrastruktura dhe siguria evropiane, përfshirë Ballkanin, nuk janë më jashtë llogaritjeve strategjike të Teheranit.
(Burimi: The Sun)
