Një predhë balistike e lëshuar nga Irani dhe që po i afrohej hapësirës ajrore të Turqisë është interceptuar dhe neutralizuar nga sistemet e mbrojtjes ajrore të NATO-s në Mesdheun Lindor, njoftoi Ministria turke e Mbrojtjes.
Sipas deklaratës zyrtare, projektili u zbulua pasi kishte kaluar mbi hapësirën ajrore të Irakut dhe Sirisë, duke u drejtuar drejt Turqisë, përpara se të angazhoheshin sistemet e mbrojtjes ajrore dhe raketore të NATO-s të vendosura në rajon.
Autoritetet turke thanë se mbetjet e predhës u gjetën në distriktin Dörtyol të provincës Hatay, pranë kufirit jugor të vendit. Sipas ministrisë, fragmentet i përkasin municioneve të përdorura nga sistemi i mbrojtjes gjatë ndërhyrjes.
Nga incidenti nuk raportohet për viktima apo të plagosur.
Në deklaratë theksohet se projektili u neutralizua në kohë përpara se të përbënte një kërcënim të drejtpërdrejtë për territorin turk.
Drejtori i Komunikimit në presidencën turke, Burhanettin Duran, tha se institucionet shtetërore po e monitorojnë situatën në kohë reale dhe se strukturat e sigurisë janë në koordinim të plotë.
“Vendosmëria dhe kapaciteti ynë për të garantuar sigurinë e vendit dhe të popullit tonë janë në nivelin më të lartë,” deklaroi ai, duke shtuar se Turqia do të marrë çdo masë të nevojshme për të mbrojtur territorin dhe hapësirën ajrore të saj.
Duran theksoi gjithashtu se Ankaraja rezervon të drejtën për t’iu përgjigjur çdo veprimi armiqësor, në përputhje me të drejtën ndërkombëtare, ndërsa paralajmëroi mediat dhe përdoruesit e rrjeteve sociale të shmangin përhapjen e informacioneve të pakonfirmuara që mund të shkaktojnë panik.
Ndërkohë, sipas mediave ndërkombëtare, ministri i Jashtëm turk Hakan Fidan ka zhvilluar një bisedë telefonike me homologun iranian Abbas Araghchi, ku i ka shprehur protestën e Ankarasë për incidentin dhe ka kërkuar shmangien e çdo veprimi që mund të përshkallëzojë më tej konfliktin në rajon.
Edhe NATO reagoi përmes një zëdhënëseje, duke dënuar incidentin dhe duke deklaruar se aleanca qëndron në mbështetje të Turqisë, ndërsa theksoi se kapacitetet e saj të mbrojtjes ajrore dhe raketore mbeten në gatishmëri të plotë.
Ngjarja vjen në një moment tensionesh të larta në Lindjen e Mesme, ndërsa rajoni i Mesdheut Lindor dhe hapësirat ajrore përreth janë vënë në alarm për shkak të rrezikut nga raketat dhe dronët e lidhur me konfliktin mes Iranit, SHBA-së dhe Izraelit.
(Burimi: Al Jazeera, Daily Sabah)
