Deklaratat e fundit të Avokatit të Popullit, Endrit Shabani, pas zjarrit në pallatin pranë QSUT, kanë lёnё gojёhapur jo pak veta.
Në vend që të fokusohet tek përgjegjësia institucionale dhe mbrojtja e qytetarëve përballë administratës, Shabani gjatё prezantimit tё raportit vjetor tё institucionit qё ia lanё tё drejtojё, ka njoftuar ngritjen e një task-force për hetimin e sigurisë së banesave në Tiranë – një iniciativë që ngre pikëpyetje të forta mbi kompetencat dhe misionin e Avokatit të Popullit.
Deklarata e tij erdhi në këtë formë:
“Zjarri i rënë zbuloi se institucionet janë të papërgatitura. Nga hetimi paraprak i yni kemi konstatuar probleme me pushtetin vendor. Kemi ngritur një Task Forcë për të hetuar sigurinë e banesave në kryeqytet. I kemi bërë thirrje Bashkisë Tiranë që menjëherë të strehojë banorët përmes programeve të strehimin social”.
Avokati i Popullit është një institucion që ka për detyrë të mbrojë qytetarët nga abuzimet e administratës dhe të evidentojë shkeljet e të drejtave të tyre, jo të ndërmarrë funksione teknike apo inspektuese mbi sigurinë e ndërtesave. Këto janë kompetenca të qarta të pushtetit vendor, inspektoriateve dhe strukturave të specializuara.
Ngritja e një “task-force” për kontrollin e banesave nga një institucion që nuk ka as mandat teknik dhe as përgjegjësi ligjore në këtë fushë, duket më shumë si një zhvendosje e rolit sesa një zgjidhje reale.
Ironikisht, vetë raporti që Shabani prezantoi për vitin 2025 evidenton një sërë problemesh të thella që bien pikërisht në fushën e veprimit të institucionit të tij: ankesa të shumta ndaj Kadastrës, vonesa të gjata në sistemin gjyqësor, mungesë dëmshpërblimesh për përmbytjet e vjetra dhe trajtim problematik i të miturve nga policia.
Këto janë çështje ku Avokati i Popullit pritet të jetë zëri kryesor i qytetarëve përballë shtetit. Por në vend të një qëndrimi të fortë për këto probleme, fokusi është zhvendosur tek iniciativa që nuk lidhen aspak me funksionin kushtetues të institucionit.
Me sa duket, më shumë sesa për një zgjidhje konkrete për sigurinë e banesave, deklarata ngjan si një përpjekje për të prodhuar reagimin e radhës publik, ndërkohë që problemet e vёrteta të qytetarëve me administratën vijojnë të mbeten aty ku kanë qёnë.
© Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
