Bilanci i viktimave nga dy tërmetet e fuqishme që goditën Venezuelën vazhdon të rëndohet. Autoritetet njoftuan se deri tani kanë humbur jetën të paktën 589 persona, ndërsa 2.980 të tjerë janë plagosur, ndërsa ekipet e shpëtimit vijojnë kërkimet mes rrënojave në zonat më të prekura.
Presidentja në detyrë, Delcy Rodríguez, deklaroi se operacionet e kërkim-shpëtimit po zhvillohen pa ndërprerje, me shpresën për të gjetur të mbijetuar të tjerë.
“Do të shpëtojmë të gjithë ata që ndodhen ende nën rrënoja. Po punojmë pa u lodhur për këtë,” tha ajo.
Sipas autoriteteve, shteti bregdetar i La Guaira ka pësuar dëmet më të rënda. Forcat e sigurisë dhe ushtria janë dislokuar në zonë për të përshpejtuar operacionet e shpëtimit, si edhe për të garantuar shpërndarjen e ushqimeve, ujit të pijshëm dhe ndihmave emergjente për banorët.
Sipas Shërbimit Gjeologjik të Shteteve të Bashkuara (USGS), Venezuela u godit të mërkurën nga dy tërmete shumë të fuqishme me magnitudë 7.2 dhe 7.5, vetëm 39 sekonda larg njëri-tjetrit.
Tërmeti më i fortë, me magnitudë 7.5, pati epiqendrën rreth 23 kilometra në juglindje të qytetit Yumare, në shtetin Yaracuy, ndërsa lëkundja paraprake me magnitudë 7.2 u regjistrua rreth 24 kilometra në verilindje të qytetit San Felipe.
Dëme të konsiderueshme janë raportuar në ndërtesa, infrastrukturë dhe rrugë në disa rajone të vendit, ndërsa mijëra banorë kanë mbetur të pastrehë.
Autoritetet paralajmërojnë se numri i viktimave mund të rritet edhe më tej, pasi shumë persona rezultojnë ende të zhdukur dhe ekipet e emergjencës vazhdojnë kërkimet në ndërtesat e shembura.
