Bullgaria duket se i ka dhënë fund krizës së gjatë politike: ish-presidenti Rumen Radev ka fituar bindshëm zgjedhjet parlamentare, duke siguruar një shumicë të qartë në parlament.
Sipas rezultateve të fundit, partia e tij “Progressive Bulgaria” ka marrë rreth 44–45% të votave dhe mbi 130 mandate, duke kaluar ndjeshëm rivalët dhe duke i dhënë mundësinë të formojë qeverinë i vetëm.
Kjo është hera e parë pas shumë vitesh që një forcë politike arrin një rezultat kaq të fortë, në një vend që ka kaluar tetë zgjedhje në pesë vite dhe një periudhë të gjatë pa stabilitet qeverisës.
Radev, i cili dha dorëheqjen nga posti i presidentit për të hyrë në garë, ka premtuar luftë kundër korrupsionit dhe rikthim të stabilitetit politik. Ai njihet për qëndrimet e tij më të afërta me Moskën dhe kritikat ndaj politikave të Bashkimit Europian, çka ka ngjallur vëmendje në Bruksel.
Fitorja e tij shihet si një mandat i fortë nga votuesit, të lodhur nga krizat e njëpasnjëshme politike dhe qeveritë jetëshkurtra.
