Departamenti i Drejtësisë i SHBA-së ka njoftuar se do të përshpejtojë procedurat për rastet federale të dënimit me vdekje, duke rikthyer dhe zgjeruar metodat e ekzekutimit, përfshirë edhe skuadrat e pushkatimit.
Sipas njoftimit zyrtar, institucioni po rivendos protokollet e përdorura gjatë administratës së parë të Donald Trump, duke përfshirë rikthimin e procedurës së injeksionit vdekjeprurës dhe zgjerimin e saj me metoda të tjera alternative si pushkatimi.
“Ndër veprimet e ndërmarra janë ripërshtatja e protokollit të injeksionit vdekjeprurës, zgjerimi për të përfshirë metoda shtesë si skuadra e pushkatimit dhe përmirësimi i proceseve të brendshme për të përshpejtuar rastet”, thuhet në deklaratë.
Aktualisht, pesë shtete amerikane lejojnë ekzekutimin me pushkatim për të dënuarit që kanë përfunduar të gjitha procedurat e apelimit. Në mars, një i dënuar në Karolinën e Jugut u bë personi i katërt që u ekzekutua me këtë metodë që nga vitet 1970.
Zakonisht, dënimet me vdekje në SHBA shoqërohen me procese të gjata apelimi që mund të zgjasin vite, përpara se ekzekutimi të kryhet. Në disa raste në nivel shtetëror, të dënuarit kanë mundësi të zgjedhin mënyrën e ekzekutimit, ndërsa injeksioni vdekjeprurës mbetet metoda standarde.
Prokurori i Përgjithshëm në detyrë, Todd Blanche, kritikoi administratën e mëparshme, duke deklaruar se ajo kishte dështuar të zbatonte dënimin maksimal ndaj kriminelëve më të rrezikshëm, përfshirë terroristët dhe autorët e vrasjeve të rënda.
“Nën udhëheqjen e Presidentit Trump, Departamenti i Drejtësisë po zbaton ligjin dhe po qëndron në krah të viktimave”, tha ai.
Autoritetet synojnë gjithashtu të përmirësojnë procesin e ndjekjes penale për dënimet kapitale dhe të ulin kohën mes dhënies së vendimit dhe ekzekutimit, duke sinjalizuar një qasje më të ashpër ndaj krimeve të rënda në nivel federal.
(Burimi: CNN)
