Ekonomia e Eurozonës po tregon një qëndrueshmëri më të madhe nga sa pritej përballë rritjes së çmimeve të energjisë dhe pasojave të luftës me Iranin. Aktiviteti i biznesit në 21 vendet e monedhës së përbashkët u zgjerua në shtator me ritmin më të shpejtë në tre vjet e gjysmë, ndërsa Gjermania dhe Franca regjistruan përmirësim të ndjeshëm të sektorit privat.
Indeksi paraprak i përbërë PMI, i cili mat aktivitetin në sektorin e prodhimit dhe të shërbimeve, u rrit nga 52 pikë në gusht në 53.1 pikë në shtator, niveli më i lartë që prej prillit 2023. Çdo rezultat mbi 50 pikë tregon zgjerim të aktivitetit ekonomik, ndërsa nën këtë nivel sinjalizon tkurrje.
Përmirësimi u shtri në të dy sektorët kryesorë. Aktiviteti në shërbime arriti nivelin më të lartë të 10 muajve të fundit, ndërsa prodhimi shënoi rezultatin më të mirë në 55 muaj.
Edhe dy ekonomitë më të mëdha të Bashkimit Europian dhanë sinjale pozitive. Gjermania regjistroi ritmin më të shpejtë të zgjerimit në afro një vit, ndërsa Franca performancën më të mirë që prej gushtit 2024.
Rezultatet vijnë pavarësisht rritjes së fortë të çmimeve të energjisë si pasojë e konfliktit në Lindjen e Mesme. Chris Williamson, kryeekonomist për biznesin në S&P Global Market Intelligence, tha se Eurozona duket se ka fituar ritëm në pjesën e fundit të vitit, megjithëse tregu i punës mbetet i dobët dhe çmimet e inputeve dhe produkteve janë rritur me ritmin më të shpejtë që prej majit.
Të dhënat surprizuan edhe ekonomistët. Carsten Brzeski, drejtues global i makroekonomisë në ING Research, i cilësoi ato “pothuajse shumë të mira për të qenë të vërteta”, duke theksuar se aktiviteti ekonomik po rritet pavarësisht përshkallëzimit në Lindjen e Mesme, çmimeve të larta të naftës, normave më të larta të interesit dhe niveleve të ulëta të ujit.
Por qëndrueshmëria e ekonomisë, e kombinuar me rikthimin e presioneve inflacioniste, mund të shtojë mundësinë e një tjetër rritjeje të normave të interesit nga Banka Qendrore Europiane.
Në fillim të shtatorit, BQE rriti normën bazë me 0.25 pikë përqindjeje, në 2.5%, duke shënuar rritjen e dytë gjatë këtij viti. Banka rriti gjithashtu parashikimin për inflacionin në vitin 2027 nga 2.3% në 2.5%.
Sipas Williamson, kombinimi i aktivitetit më të fortë ekonomik dhe rritjes së çmimeve e vendos tashmë seriozisht në diskutim një rritje tjetër të normave që në tetor. Brzeski paralajmëroi megjithatë se mbetet për t’u parë nëse rezistenca e Eurozonës ndaj goditjes energjetike dhe problemeve në zinxhirët e furnizimit do të vazhdojë.
Burimi: Euractiv
