Një valë e pazakontë dhe intensive të nxehti po godet Evropën, duke thyer rekorde historike temperaturash në disa vende dhe duke vënë në alarm autoritetet për rrezikun ndaj shëndetit publik, energjisë dhe mjedisit.
Franca, në qendër të fenomenit atmosferik që meteorologët e quajnë “kupolë nxehtësie” (heat dome), regjistroi të mërkurën ditën më të nxehtë në historinë e matjeve meteorologjike. Sipas shërbimit kombëtar francez të motit, temperatura mesatare kombëtare arriti në 30 gradë Celsius, duke thyer rekordin e vendosur vetëm një ditë më parë.
Në disa zona të Francës temperaturat kaluan 40 gradë Celsius, ndërsa në qytetin Palluau termometri arriti deri në 43.8 gradë Celsius.
Situata është alarmante edhe në Mbretërinë e Bashkuar, ku rekordet e qershorit u thyen disa herë brenda të njëjtës ditë. Shërbimi meteorologjik britanik konfirmoi temperaturën 36.1 gradë Celsius në Gosport, duke kaluar rekordin e mëparshëm prej 35.6 gradësh që mbahej prej vitit 1976.
Autoritetet britanike kanë shpallur paralajmërime për temperatura ekstreme, një masë tepër e rrallë, ndërsa parashikimet tregojnë se vala e të nxehtit do të vazhdojë edhe gjatë ditëve në vijim.
Dhjetëra viktima dhe mijëra persona pa energji
Pasojat e të nxehtit tashmë po ndihen në disa vende evropiane.
Kryeministri francez bëri të ditur se të paktën 40 persona janё mbytur që prej 18 qershorit, ndërsa kërkonin të freskoheshin në lumenj, liqene apo zona bregdetare.
Ekspertët paralajmërojnë se bilanci real i viktimave të lidhura me temperaturat ekstreme mund të jetë shumë më i lartë, pasi vdekjet nga nxehtësia zakonisht evidentohen vetëm pas analizave të mëvonshme statistikore.
Meteorologët francezë po e krahasojnë situatën me valën shkatërruese të vitit 2003, e cila shkaktoi rreth 15 mijë viktima vetëm në Francë.
Ndërkohë, rrjetet energjetike po përballen me presion të jashtëzakonshëm.
Në Francë, një transformator elektrik doli jashtë funksionit si pasojë e temperaturave të larta, duke lënë pa energji dhjetëra mijëra familje.
Probleme të ngjashme janë raportuar edhe në Itali, ku përdorimi masiv i kondicionerëve shkaktoi ndërprerje të energjisë në disa qytete. Muzeu i famshëm Uffizi në Firence u detyrua të mbyllej përkohësisht pas një ndërprerjeje të furnizimit me energji.
Breshër në Romë mes valës së nxehtësisë
Ndërsa pjesa më e madhe e Evropës po përballet me temperatura rekord, Roma përjetoi një fenomen të pazakontë meteorologjik.
Në kryeqytetin italian ra breshër i dendur, me copa akulli që goditën automjete dhe pemë, duke krijuar kontrast me temperaturat e larta që po dominojnë rajonin.
Meteorologët shpjegojnë se temperaturat e larta mund të favorizojnë krijimin e stuhive të fuqishme, të cilat shpesh shoqërohen me reshje intensive dhe breshër.
Alarm për zjarret dhe ndryshimet klimatike
Franca ka vendosur në gatishmëri shërbimet e emergjencës dhe forcat ushtarake për shkak të rrezikut të lartë të zjarreve.
Në të njëjtën kohë, shkencëtarët e klimës po e lidhin drejtpërdrejt intensitetin e kësaj vale të nxehti me ngrohjen globale dhe përdorimin e vazhdueshëm të lëndëve djegëse fosile.
Evropa konsiderohet kontinenti që po ngrohet më shpejt në botë, ndërsa Organizata Botërore e Shëndetësisë ka paralajmëruar se mbi 200 mijë persona kanë humbur jetën nga shkaqe të lidhura me nxehtësinë gjatë katër viteve të fundit në kontinent.
Sipas parashikimeve, temperaturat ekstreme pritet të vazhdojnë edhe gjatë ditëve të ardhshme, me mundësi për thyerje të reja rekordesh në Francë, Britani, Spanjë dhe vende të tjera të Evropës Perëndimore.
