Allison Guerriero, ish-e dashura e Charles McGonigal dhe gruaja që denoncoi te autoritetet amerikane ish-zyrtarin e fuqishëm të FBI-së, është gjetur e vdekur në Shtetet e Bashkuara. Vdekja e saj rikthen në vëmendje një prej skandaleve më të mëdha që goditi FBI-në në vitet e fundit, me degëzime nga Rusia deri në Shqipëri dhe me takimet e McGonigal me kryeministrin Edi Rama të bëra pjesë të dosjes amerikane.
Daily Mail raporton se Guerriero është gjetur e vdekur në rrethana që ende nuk janë sqaruar plotësisht, ndërsa ka publikuar edhe pamje nga videoja e saj e fundit dhe detaje nga komunikimet përpara vdekjes. Babai i saj ka deklaruar se nuk beson se vajza e tij do t’i kishte dhënë fund vetë jetës.
Deri tani nuk ka të dhëna që ta lidhin vdekjen e Guerriero me çështjen McGonigal. Por emri i saj është i lidhur pazgjidhshmërisht me rënien e një prej njerëzve më të rëndësishëm të kundërzbulimit amerikan.
Guerriero kishte pasur një marrëdhënie intime me McGonigal, në kohën kur ai mbante poste të larta në FBI. Pas përfundimit të marrëdhënies, ajo kontaktoi autoritetet federale dhe ngriti alarmin për aktivitetet, kontaktet dhe marrëdhëniet financiare të tij.
Pak vite më vonë, McGonigal, ish-shef i kundërzbulimit të FBI-së në Nju Jork, do të përfundonte vetë i arrestuar dhe i akuzuar në dy dosje federale: njëra për lidhjet me oligarkun rus të sanksionuar Oleg Deripaska dhe tjetra për fshehjen e marrëdhënieve dhe të 225 mijë dollarëve cash që kishte marrë nga një person me lidhje me Shqipërinë.
Pikërisht dosja e dytë shkaktoi një stuhi politike edhe në Tiranë.
Sipas dokumenteve të drejtësisë amerikane, McGonigal kishte marrë 225 mijë dollarë nga një person që prokurorët e përshkruanin si ish-zyrtar të huaj të sigurisë dhe biznesmen me lidhje me qeverinë shqiptare. Ai nuk ia kishte deklaruar FBI-së këtë marrëdhënie financiare dhe kishte fshehur gjithashtu udhëtimet dhe kontaktet e tij jashtë Shteteve të Bashkuara.
Në këtë histori hynë edhe takimet e McGonigal me kryeministrin Edi Rama gjatë udhëtimeve të tij në Shqipëri. Kontaktet me kryeministrin shqiptar u bënë pjesë e kronologjisë së dosjes amerikane, ndërsa çështja shkaktoi për muaj me radhë përplasje të forta politike në Shqipëri.
Rama nuk ishte i pandehur në procesin amerikan dhe nuk u akuzua nga drejtësia e SHBA-së për veprat penale për të cilat u dënua McGonigal.
Por vetë Guerriero ka folur publikisht edhe për Shqipërinë. Pas shpërthimit të skandalit, ajo tregoi se kur kishte denoncuar McGonigal në FBI kishte ngritur pikëpyetje edhe për udhëtimet dhe aktivitetin e tij në Shqipëri, duke përmendur në deklarimet e saj edhe kryeministrin Rama.
Guerriero bëri në atë kohë edhe akuza të forta politike mbi marrëdhënien mes McGonigal dhe autoriteteve shqiptare. Ajo që u provua në drejtësinë amerikane ishte se McGonigal kishte fshehur nga FBI informacione të rëndësishme për marrëdhëniet e tij jashtë institucionit dhe marrjen e 225 mijë dollarëve. Ai pranoi fajësinë në çështjen e Uashingtonit dhe u dënua me 28 muaj burg.
Paralelisht, ish-shefi i kundërzbulimit u dënua edhe për dosjen ruse. McGonigal pranoi se kishte punuar për interesat e oligarkut rus Oleg Deripaska, i cili ndodhej nën sanksionet amerikane. Për këtë çështje mori një dënim prej 50 muajsh burg.
Kështu, njeriu që për vite kishte qenë përgjegjës për hetimin e kërcënimeve të huaja dhe çështjeve tepër të ndjeshme të sigurisë kombëtare amerikane përfundoi vetë pas hekurave për marrëdhënie që kishte fshehur nga institucioni ku shërbente.
Allison Guerriero ishte një prej personave që vuri në lëvizje hetimin për të.
Tani vdekja e saj e papritur e rikthen emrin e McGonigal në vëmendjen e mediave ndërkombëtare dhe, bashkë me të, edhe kapitullin shqiptar të historisë së ish-shefit të kundërzbulimit të FBI-së.
