Gjykata Penale Ndërkombëtare (GJPN) ka shpallur fajtor ish-komandantin rebel të Republikës së Afrikës Qendrore, Mahamat Said Abdel Kani, për katër akuza për krime kundër njerëzimit, të kryera gjatë periudhës kur ai drejtonte një qendër paraburgimi në kryeqytetin Bangui në vitin 2013.
Gjykata konstatoi se 56-vjeçari mbikëqyri rrahjen dhe keqtrajtimin e të burgosurve në një periudhë kur vendi ishte përfshirë nga lufta civile dhe dhuna sektare. Said ishte një nga komandantët kryesorë të grupit rebel kryesisht mysliman Seleka, i cili rrëzoi nga pushteti Presidentin François Bozizé në vitin 2013.
Pas marrjes së pushtetit nga Seleka, Said u vendos në drejtimin e Zyrës Qendrore për Shtypjen e Banditizmit (OCRB), një strukturë paraburgimi në Bangui. Të burgosurit, shumë prej të cilëve dyshoheshin si mbështetës të Bozizé, iu nënshtruan formave të ndryshme të torturës dhe keqtrajtimit.
Sipas provave të paraqitura në gjykatë, të ndaluarit rriheshin dhe goditeshin me kamxhik, ndërsa disa iu nënshtruan gjymtimeve trupore. Ata mbaheshin gjithashtu pa ushqim dhe ujë, në kushte aq të rënda sa disa prej tyre detyroheshin të pinin urinën e tyre.
Një prej qelive njihej si “gropa”, ku të burgosurit mbaheshin në kushte veçanërisht të rënda. Sipas gjykatës, kjo qeli ndodhej drejtpërdrejt poshtë zyrës së Said. Gjykata konstatoi se ai jo vetëm mbikëqyrte keqtrajtimet, por kishte marrë pjesë personalisht në rrahjen e të paktën një të burgosuri.
Said i kishte mohuar të gjitha akuzat gjatë procesit. Përveç katër akuzave për krime kundër njerëzimit, ai përballej edhe me tre akuza për krime lufte, për të cilat u shpall i pafajshëm.
Krimet për të cilat u zhvillua procesi janë kryer nga prilli deri në gusht të vitit 2013. Said iu dorëzua Gjykatës Penale Ndërkombëtare nga autoritetet e Republikës së Afrikës Qendrore në vitin 2021, ndërsa gjyqi ndaj tij nisi në shtator 2022. Ky ishte procesi i parë në GJPN ndaj një anëtari të grupit Seleka.
Masa e dënimit do të shpallet në një datë të mëvonshme dhe mund të arrijë deri në burgim të përjetshëm.
