FBI-ja po heton një pretendim serioz të grupit të hakerëve ShinyHunters, i cili thotë se ka vjedhur të dhënat personale dhe profesionale të të gjithë stafit të Byrosë Federale të Hetimit, rreth 38 mijë persona.
Sipas grupit, mes të dhënave të siguruara janë emrat, funksionet, numrat e distinktivëve, adresat e banimit, numrat e telefonit dhe informacione për bashkëshortët e agjentëve.
BBC thotë se ka parë një pjesë të vogël të materialit të ofruar nga hakerët dhe se të dhënat e kontrolluara duken autentike, megjithëse përmasat e pretenduara të sulmit ende nuk janë konfirmuar.
Disa prej informacioneve të vjedhura dyshohet se tregojnë edhe detyrat konkrete të zyrtarëve të FBI-së, përfshirë punën sensitive kundër spiunazhit kinez, inteligjencës ruse dhe karteleve të drogës.
ShinyHunters pretendon se ka hyrë në sistemet e FBI-së përmes një dobësie në sistemin cloud të Oracle dhe se ka pasur akses në disa platforma, mes tyre sisteme që përdoren për rekrutimin, verifikimin e punonjësve dhe kandidatëve, të dhënat mjekësore të agjentëve dhe informacione hetimore. FBI-ja po verifikon nëse është cenuar drejtpërdrejt infrastruktura e saj apo një ofrues i jashtëm.
Në këtë rast, hakerët pretendojnë se motivi nuk është financiar. Ata i kanë dhënë FBI-së një javë afat, duke kërkuar të tërhiqet ose ndryshohet një paralajmërim publik i publikuar në maj, ku ShinyHunters përshkruhej si grup që përdor pretendime reale ose të ekzagjeruara për vjedhjen e të dhënave me qëllim ushtrimin e presionit ndaj viktimave. Në të kundërt, grupi kërcënon se do të publikojë bazat e plota të të dhënave.
FBI-ja ka konfirmuar se është në dijeni të pretendimeve dhe se po e heton çështjen në mënyrë intensive, duke punuar edhe me ofruesit e jashtëm që mbështesin sistemet e saj.
Ish-kreu i Qendrës Kombëtare të Sigurisë Kibernetike të Britanisë, Ciaran Martin, tha se, nëse pretendimet konfirmohen, bëhet fjalë për një incident ndër më seriozët që mund të ndodhin në fushën e cenimit të të dhënave.
Burimi: BBC
