Një kirurg nga Florida, i akuzuar për vrasje të paqëllimshme pasi i hoqi gabimisht mëlçinë një pacienti në vend të shpretkës, ka rrëfyer se është “i shkatërruar” dhe se do ta mbajë këtë ngjarje me vete për gjithë jetën.
44-vjeçari Thomas Shaknovsky po përballet me ndjekje penale pas vdekjes së 70-vjeçarit William Bryan gjatë një operacioni që përfundoi në tragjedi dhe tronditi opinionin publik në SHBA.
Në një dëshmi tetë-orëshe të dhënë në nëntor dhe të publikuar së fundmi nga NBC, kirurgu e quajti ngjarjen “tepër të pafat” dhe tha se ndihet “përgjithmonë i traumatizuar”.
“Jam i shkatërruar, i demoralizuar. Qava për vdekjen e tij. Ndjeva se e kisha zhgënjyer”, deklaroi ai.
Sipas dokumenteve hetimore, Shaknovsky i hoqi pacientit mëlçinë duke besuar se po hiqte shpretkën. Më pas, ai urdhëroi një infermiere që organi të etiketohej si “shpretkë” dhe të njëjtin përshkrim e vendosi edhe në raportin pas operacionit.
Familja e viktimës e akuzon kirurgun për përpjekje për të fshehur gabimin fatal. Në padinë civile të ngritur nga bashkëshortja e Bryan thuhet se mjeku “me vetëdije shmangu çdo referencë për heqjen e mëlçisë” për të mbuluar neglizhencën e rëndë.
Sipas autoriteteve, pacienti pësoi humbje masive gjaku në sallën e operacionit dhe vdiq në tryezë.
Kirurgu përshkroi momentet dramatike në sallë si kaotike dhe të dëshpëruara. Ai tha se stafi mjekësor po kryente kompresione në gjoks ndërsa ai përpiqej të gjente burimin e gjakderdhjes.
“Nuk mund ta dalloja ndryshimin sepse isha shumë i tronditur”, tha ai për organin që identifikoi gabimisht.
Ai e krahasoi situatën me “një lavaman të bllokuar plot ujë”, ndërsa kërkonte me duar burimin e hemorragjisë.
“Pas 20 minutash përpjekjesh të dëshpëruara për t’i shpëtuar jetën, ndodhi gabimi fatal”, tha Shaknovsky.
Pas dështimit për ta rikthyer në jetë pacientin, kirurgu tregoi se u izolua në bibliotekën e spitalit për të qarë larg stafit.
“Shkova atje sepse isha i shkatërruar. Nuk doja që të më shihnin në atë gjendje”, deklaroi ai.
Edhe pse shpretka zakonisht është shumë më e vogël se mëlçia, mjeku pretendon se besonte që organi ishte i zmadhuar për shkak të një mase të dyshuar. Por sipas familjes së viktimës, një mjek tjetër u ka thënë se shpretka e William Bryan ishte pothuajse normale anatomikisht.
Nëse shpallet fajtor për vrasje të paqëllimshme, Shaknovsky rrezikon deri në 15 vite burg dhe një gjobë prej 10 mijë dollarësh.
(Burimi: The Guardian)
