Të jesh një nga menaxheret e departamenteve në JP Morgan, një nga bankat më të mëdha në botë, nuk është thjesht një arritje. Duhet shumë punë, aftësi dhe besim për të arritur aty. Shqiptarja Lorna Hajdini, një studente e shkëlqyer, ka fituar besimin e drejtuesve të bankës dhe punon prej vitesh në këtë institucion.
Aq besim ka krijuar, sa sipas raportimeve, akuzat ndaj saj nuk janë konsideruar të besueshme nga vetë banka dhe ajo vazhdon normalisht punën.
Gjithsesi, rasti dhe akuza e kolegut të saj, një shtetas indian, bëri njëfarë buje në rrethet e Wall Street, pavarësisht se këto histori nuk janë të panjohura në atë botë, ku skandale të ngjashme kanë qarkulluar ndër vite.
Fenomeni Lorna
Lorna Hajdini është dalluar që herët si një nxënëse e shkëlqyer në Shqipëri. Ajo përfundoi arsimin 8 vjeҫar këtu dhe u veçua për rezultatet dhe përkushtimin ndaj studimit. Bashkëmoshatarët e saj shpesh shpreheshin se “Lorna do të bëhet dikush… do bëjë gjëra të mëdha”.
Dhe kështu ndodhi.
Në një moshë të re, pas ndarjes nga jeta të babait, ajo u shpërngul në Shtetet e Bashkuara së bashku me nënën e saj. Aty vijoi studimet dhe ndërtoi gradualisht karrierën e saj në një nga tregjet më konkurruese në botë – financën ndërkombëtare.
Me disiplinë dhe fokus të vazhdueshëm te puna, Hajdini arriti të ngjitet në nivele të larta profesionale, duke shmangur jetën publike dhe duke qëndruar larg vëmendjes mediatike.
Gjithmonë e fokusuar te studimet dhe më pas te puna, Hajdini nuk krijoi familje – një fakt që në këtë histori përmendet si një element që mund të jetë përdorur nga pala akuzuese për të ndërtuar narrativën e saj.
E vërteta?
Sipas asaj që është raportuar nga burime të ndryshme dhe nga vetë institucioni, akuza ndaj Hajdinit është ngritur nga një ish-koleg i saj, i cili pretendohet se kishte kërkuar më parë një dëmshpërblim financiar nga banka.
Pas refuzimit të kësaj kërkese, ai ka ngritur padi me akuza të rënda ndaj saj.
Një hetim i brendshëm i zhvilluar nga JP Morgan, që përfshinte analiza të komunikimeve, të dhënave dhe dëshmive të punonjësve, ka dalë në përfundimin se akuzat nuk mbështeten në prova të mjaftueshme. Sipas raportimeve, banka ka deklaruar se pretendimet janë të pabazuara.
Nga ana tjetër, vetë akuzuesi raportohet se nuk ka bashkëpunuar plotësisht me hetimin.
Ndërkohë, Lorna Hajdini ka mohuar që në fillim çdo akuzë ndaj saj.
Çështja vijon
Çështja tashmë është në gjykatë dhe pritet të marrë një përgjigje përfundimtare nga drejtësia amerikane.
Mediat ndërkombëtare e kanë trajtuar rastin me kujdes, duke theksuar se bëhet fjalë për akuza që duhet të provohen në gjykatë dhe jo për përfundime të parapërcaktuara.
E vёrteta e Lornёs anon nga Shqipёria pёr ne dhe nga India pёr indianёt.
A ishte Lorna “kamzhiku” i indianit, apo ai donte tё pёrfitonte nga shakatё ballkanike tё saj?
