Një nga figurat kryesore të industrisë së komunikimit politik në Hungari, Gyula Balásy, po përballet me hetime për kontrata publike të dyshuara si të fryra, ndërsa dokumentet tregojnë se një prej kompanive të tij hapi një filial në Dubai gjatë kohës kur hetimi ishte tashmë në zhvillim.
Autoritetet hungareze kanë ngrirë llogaritë e disa kompanive të Balásy, biznesmen i njohur për rolin e tij në ndërtimin e asaj që kundërshtarët e ish-kryeministrit Viktor Orbán e kanë quajtur “makineria e propagandës” së qeverisë së tij.
Sipas dokumenteve të siguruara nga OCCRP dhe media hungareze Átlátszó, kompania New Land Media krijoi në tetor 2024 një filial në Dubai, në Emiratet e Bashkuara Arabe, ndërkohë që autoritetet po hetonin prej muajsh kontrata shtetërore për komunikim dhe dyshime për keqpërdorim fondesh.
Balásy rezulton gjithashtu pronar i një apartamenti luksoz në Dubai, blerja e të cilit nisi në maj 2023 për rreth 3.2 milionë dirhamë, ose afërsisht 870 mijë dollarë, dhe u finalizua zyrtarisht në vitin 2025.
Në të njëjtin vit, New Land Media rezulton se dha rreth 1.3 miliardë forinta, afro 4.2 milionë dollarë, kredi afatgjata një filiali. Kompania kishte vetëm dy filiale, një në Hungari dhe tjetrin në Dubai, ndërsa dokumentet financiare të filialit hungarez nuk tregojnë marrjen e këtyre fondeve. Balásy nuk ka sqaruar nëse paratë përfunduan në Dubai.
Hetimi ndaj kompanive të tij ka nisur të paktën që në prill 2024, por ngrirja e llogarive ndodhi vetëm pasi Viktor Orbán humbi zgjedhjet në prill të këtij viti, pas 16 vitesh në pushtet. Kryeministri i ri, Péter Magyar, ka nisur një ofensivë politike dhe institucionale kundër dyshimeve për keqpërdorim të fondeve publike gjatë qeverisjes së mëparshme.
Kompanitë e Balásy, të mbledhura nën rrjetin Lounge Group, për vite me radhë morën kontrata të mëdha shtetërore për fushata reklamimi, blerje hapësirash mediatike dhe organizim eventesh për institucionet publike. New Land Media kishte një rol kyç në shpërndarjen e reklamave qeveritare dhe, sipas raportimeve investigative hungareze, pjesa dërrmuese e fondeve shkonte drejt mediave pro-Orbán.
Vetëm gjashtë muaj pasi hetimi kishte nisur, kompanitë e Balásy fituan në tetor 2024 një tjetër marrëveshje të madhe kornizë shtetërore, me vlerë deri në 75 miliardë forinta, rreth 243 milionë dollarë.
Burimi: OCCRP
