Në një moment kur disa prej emrave më të mëdhenj të industrisë së inteligjencës artificiale po paralajmërojnë për rreziqet e zhvillimit të saj me ritme tepër të shpejta, presidenti amerikan Donald Trump ka zgjedhur një drejtim tjetër: të krijojë një strukturë të posaçme për AI, por pa frenuar rritjen e industrisë.
Trump njoftoi se do të krijojë një “AI Force” dhe se së shpejti do të emërojë edhe një “AI czar”, një zyrtar që pritet të ketë një rol qendror në këtë nismë.
Presidenti amerikan e krahasoi strukturën e re me “Space Force”, forcën hapësinore që krijoi gjatë mandatit të tij të parë.
“Për këtë qëllim, po krijoj AI Force, njësoj siç bëra me Space Force”, shkroi Trump në Truth Social, duke shtuar se emri i personit që do ta drejtojë do të bëhet publik së shpejti.
Por pjesa më interesante e njoftimit lidhet me filozofinë që Trump synon të ndjekë ndaj inteligjencës artificiale.
Në vend të kufizimeve të reja, ai premtoi se administrata e tij nuk do ta pengojë apo ngadalësojë zhvillimin e kësaj industrie. Sipas Trump, sistemet ekzistuese të drejtësisë penale dhe civile janë të mjaftueshme për të ndërhyrë kur shfaqen probleme.
Ai e përshkroi inteligjencën artificiale si “revolucionin e ardhshëm industrial” dhe parashikoi se teknologjia mund të arrijë të përfaqësojë 25% të Prodhimit të Brendshëm Bruto të Shteteve të Bashkuara. Trump deklaroi gjithashtu se SHBA është përpara Kinës në garën e AI dhe se synon ta ruajë këtë avantazh.
Njoftimi vjen pikërisht në kohën kur debati brenda vetë industrisë po merr një kthesë të pazakontë.
Disa prej kompanive më të mëdha të inteligjencës artificiale po diskutojnë krijimin e një organizmi për vendosjen e standardeve dhe vetërregullimin e sektorit. OpenAI, Google dhe Anthropic janë mes kompanive që kanë mbështetur idenë e një strukture të tillë.
Edhe drejtues të industrisë kanë shprehur shqetësime për ritmin me të cilin po zhvillohet teknologjia. Drejtuesi i Anthropic, Dario Amodei, ka kërkuar ngadalësimin e zhvillimit të AI, një qëndrim që sipas raportimit është mbështetur edhe nga Sam Altman i OpenAI, Elon Musk dhe Demis Hassabis i Google DeepMind.
Këto paralajmërime janë intensifikuar pas shqetësimeve të ngritura nga studiues të inteligjencës artificiale për humbjen e mundshme të kontrollit mbi sistemet gjithnjë e më të avancuara.
Trump, megjithatë, i ka hedhur poshtë thirrjet për frenimin e zhvillimit të AI, duke i cilësuar paralajmërimet si të ekzagjeruara dhe duke argumentuar se kufizimet mund të dëmtojnë avantazhin teknologjik amerikan.
Kështu, ndërsa një pjesë e njerëzve që po ndërtojnë teknologjinë më të fuqishme të momentit kërkojnë më shumë kujdes dhe kontroll, Shtëpia e Bardhë po sinjalizon se prioriteti i saj do të jetë tjetër: ta mbikëqyrë inteligjencën artificiale, por pa i hequr këmbën nga gazi.
