Lufta për një vend në Këshillin e Lartë Gjyqësor duket se po hyn në fazën më delikate.
Gjykata Administrative e Shkallës së Parë në Tiranë, me gjyqtare Ema Shahollin, ka pranuar padinë e dekanes së Fakultetit të Drejtësisë, Dorina Hoxha, duke shfuqizuar aktin administrativ të rektorit Artan Hoxha, me të cilin ajo ishte pezulluar nga detyra më 20 maj 2026, pak pasi kishte shpallur kandidaturën për anëtare të Këshillit të Lartë Gjyqësor.
Dorina Hoxha nuk është një kandidate e zakonshme. Ajo kryeson listën e kandidatëve të miratuar nga Fakulteti i Drejtësisë për vendin vakant në KLGJ, ku garon përballë kolegëve të saj Skerdian Kurti, Jonad Bara, Kristinka Jançe, Anjeza Liçenji, Besnik Çerekja dhe Fjorda Shqari.
Pikërisht për këtë arsye, pezullimi i saj u pa si detyrim ligjor që në fillim, për të mos ndikuar drejtpërdrejt në procesin e përzgjedhjes.
Vendimi është dhënë nga gjyqtarja Ema Shaholli, e cila ka lidhje familjare me një nga anëtaret aktuale të Këshillit të Lartë Gjyqësor, Irena Plakun.
Tashmë vëmendja zhvendoset te zbardhja e plotë e vendimit. Mbetet për t’u parë mbi cilat argumente juridike Gjykata e konsideroi të paligjshëm pezullimin e dekanes dhe, mbi të gjitha, si do të veprojë Universiteti i Tiranës në vijim. A do të rikthehet Dorina Hoxha menjëherë në detyrë apo rektori do të ndjekë rrugët e tjera procedurale që i njeh ligji?
Gara për anëtarin e Këshillit të Lartë Gjyqësor nga rradhët e pedagogëve të fakulteteve të drejtësisë ende nuk ka përfunduar dhe çdo zhvillim në këtë fazë mund të ndikojë në raportet mes kandidatëve në “luftën” për një vend influencues në një nga institucionet më të rëndësishme të sistemit të drejtësisë.
