Një grua është arrestuar dhe akuzuar për tentativë vrasjeje pasi dyshohet se ka qëlluar me armë drejt shtëpisë së këngëtares së njohur Rihanna në Los Angeles.
Sipas Policisë, incidenti ndodhi të dielën rreth orës 13:20 me orën lokale, kur disa të shtëna u drejtuan drejt pronës së artistes. Autoritetet bëjnë të ditur se rreth pesë deri nё shtatë plumba janë qëlluar nё drejtim tё portës së jashtme të shtëpisë, por nuk kanë goditur vetë ndërtesën.
Policia konfirmoi se nuk pati të lënduar, edhe pse në momentin e incidentit kishte njerëz brenda shtëpisë.
E dyshuara, një grua rreth të 30-ave, u lokalizua dhe u arrestua pa incidente të tjera, ndërsa të hënën policia njoftoi se ajo është identifikuar si Ivanna Lisette Ortiz dhe është akuzuar për tentativë vrasjeje. Sipas autoriteteve, ajo mbahet në paraburgim me një garanci prej 10.2 milionë dollarësh.
Përfaqësues të këngëtares Rihanna dhe partnerit të saj, reperit A$AP Rocky, nuk kanë komentuar ende mbi ngjarjen.
Artistja e njohur dhe sipërmarrësja, një nga figurat më të suksesshme të muzikës pop, u bë nënë për herë të tretë në shtator të vitit të kaluar, pasi kishte bërë publike shtatzëninë gjatë eventit të modës Met Gala në maj. Ndërkohë, ajo vazhdon të punojë për albumin e saj të nëntë muzikor, ndërsa projekti i fundit i publikuar prej saj mbetet albumi “Anti” i vitit 2016.
