Teksa inteligjenca artificiale po futet me shpejtësi në çdo aspekt të jetës moderne, nga mjekësia te drejtësia e deri te lufta, ekspertët po ngrenë një pyetje që deri pak vite më parë dukej si fantashkencë: çfarë ndodh nëse njerëzit ia dorëzojnë vendimmarrjen plotësisht makinave?
Pikërisht këtë paralajmërim dha eksperti dhe autori francez Charles-Edouard Bouee gjatë konferencës së teknologjisë GITEX AI në Almaty.
“Nëse mbështetemi vetëm te makinat, atëherë po krijojmë një botë që del jashtë kontrollit tonë”, tha ai.
Sipas Bouee, inteligjenca artificiale mund të përmirësojë ndjeshëm cilësinë e jetës, por vetëm nëse përdoret si një mjet që ndihmon njeriun dhe jo si zëvendësim i tij.
Ai paralajmëroi se obsesioni për automatizimin total rrezikon të krijojë shoqëri ku njerëzit humbasin jo vetëm vendet e punës, por edhe aftësinë për të menduar, reflektuar dhe marrë vendime vetë.
“Qeniet njerëzore kanë nevojë për kohë që të rriten, ashtu si pemët”, tha ai, duke kritikuar kulturën moderne të përgjigjeve të menjëhershme dhe varësinë gjithnjë e më të madhe nga makinat.
Sipas tij, qëllimi real i AI-së duhet të jetë eliminimi i punëve mekanike dhe pa vlerë, në mënyrë që njerëzit të fokusohen te krijimtaria, mendimi kritik dhe aktivitetet me vlerë të lartë.
Bouee solli si shembull sektorin e shëndetësisë, ku inteligjenca artificiale tashmë po transformon sistemet mjekësore, duke ndihmuar në diagnostikim, kirurgji më preҫize dhe kërkime mbi jetëgjatësinë.
Por ai këmbëngul se teknologjia duhet të mbetet gjithmonë nën kontrollin njerëzor.
“Inteligjenca e shtuar nga makina duhet të fuqizojë njerëzit, jo t’i zëvendësojë ata”, tha eksperti francez.
Ai paralajmëroi gjithashtu qeveritë që të përgatiten për revolucionin teknologjik duke ritrajnuar fuqinë punëtore, sepse frika ndaj AI-së vjen kryesisht nga pasiguria dhe mungesa e përgatitjes.
Në analizën e tij globale, Bouee foli edhe për garën e madhe mes SHBA-sё dhe Kinёs për dominimin e inteligjencës artificiale.
Sipas tij, SHBA-ja vazhdon të udhëheqë revolucionin teknologjik, ndërsa Kina po afrohet me shpejtësi. Europa, ndërkohë, ka mbetur pas.
Megjithatë, ai beson se Europa dhe vende si Turqia kanë një avantazh tjetër: traditën dhe vlerat njerëzore.
“Duhet të gjejmë ekuilibrin mes vlerave njerëzore dhe progresit teknologjik”, tha ai.
Dhe ndoshta pikërisht aty qëndron frika më e madhe e epokës moderne: jo te fakti që makinat po bëhen më inteligjente, por te rreziku që njerëzit, gradualisht, të heqin dorë nga vetë roli i tyre në botë.
(Burimi: AA)
