Papa Leo XIV ka lëshuar një paralajmërim të fortë mbi ndikimin e inteligjencës artificiale, duke thënë se zhvillimi i saj i pakontrolluar mund të përshkallëzojë polarizimin, konfliktet dhe madje dhunën në shoqëri.
Gjatë një fjalimi në Universitetin Katolik të Afrikës Qendrore në Yaoundé, Kamerun, Papa theksoi se sfida e teknologjive të reja nuk lidhet vetëm me përdorimin e tyre, por me një ndryshim më të thellë: mënyrën si njerëzit e perceptojnë realitetin dhe të vërtetën.
“Rreziku nuk është vetëm gabimi, por zëvendësimi gradual i realitetit me simulimin e tij”, u shpreh ai, duke paralajmëruar se kjo mund të çojë në përhapjen e frikës dhe tensioneve sociale.
Në të njëjtën kohë, Papa kritikoi edhe anën tjetër të “boom-it digjital”: koston mjedisore dhe njerëzore. Ai vuri në dukje se kërkesa për minerale të rralla, të nevojshme për teknologjinë dhe serverët e mëdhenj, po shkakton dëme të mëdha në vende si ato afrikane, ku nxjerrja e këtyre burimeve shpesh shoqërohet me konflikte dhe shfrytëzim.
Mesazhi i tij ishte i dyfishtë: të rinjtë nuk duhet të kenë frikë nga teknologjia, por duhet ta përdorin me përgjegjësi. Ai u bëri thirrje veçanërisht të rinjve afrikanë të mos bien pre e dhunës apo manipulimit, pavarësisht vështirësive ekonomike dhe sociale.
Paralajmërimi vjen në një moment kur inteligjenca artificiale po përhapet me shpejtësi në çdo aspekt të jetës, duke hapur mundësi të mëdha – por edhe rreziqe që, sipas Papës, mund të ndryshojnë mënyrën si shoqëritë funksionojnë dhe bashkëjetojnë.
(Burimi: France 24, AFP)
