Një ngjarje e rëndë ka tronditur Akademia e Sigurisë, pasi 56 studentë përfunduan në spital me simptoma helmimi, pas konsumimit të ushqimit në ambientet e institucionit ku trajnohen efektivët e ardhshëm të Policisë së Shtetit.
Studentët u transportuan me urgjencë drejt Repartit Infektiv në Qendrёn Spitalore Universitare “Nënë Tereza”, ku morën ndihmë mjekësore. Sipas autoriteteve, të gjithë kanë dalë nga spitali në gjendje të mirë shëndetësore.
Ngjarja ka nxjerrë në pah një problem shumë më të gjerë sesa vetë episodi i helmimit. Hetimet e para kanë çuar drejt kompanisë së kateringut të kontraktuar për furnizimin me ushqim në Akademinë e Sigurisë. Policia njofton se ka arrestuar kuzhinierin dhe një teknologe ushqimi të kompanisë, ka proceduar penalisht një tjetër punonjëse dhe ka shpallur në kërkim administratoren e shoqërisë.
Megjithatë, përgjegjësia nuk mund të mbetet vetëm te personat që përgatisnin ushqimin. Hetimi pritet të shkojë më tej, për të kuptuar mënyrën se si është përzgjedhur kjo kompani, standardet që ka pasur detyrimin të përmbushë dhe mekanizmat e kontrollit që duhej të garantonin sigurinë ushqimore në një institucion shtetëror kaq të rëndësishëm.
Në fokus duhet të jetë edhe verifikimi i subjekteve tё tjera shtetёrore apo private ku kjo shoqëri ofron shërbime kateringu, si dhe mënyra se si monitorohen kontratat që financohen me para publike.
Ky rast duhet tё shёrbejё si shembull pёr tё vёnё para pёrgjegjёsisё gjithë zinxhirin administrativ dhe institucional që duhet të garantojë standardin qё blihet me fondet publike, sidomos në institucione që lidhen drejtpërdrejt me sigurinë dhe formimin e strukturave të shtetit.
Njoftimi i plotё i Policisё sё Shtetit mbi ngjarjen:
Dje, janë dërguar për ndihmë mjekësore në Repartin Infektiv të QSUT-së, 56 studentë të Akademisë së Sigurisë, të cilët dyshohet se janë helmuar pas konsumimit të ushqimit në ambientet e Akademisë së Sigurisë.
Të gjithë studentët morën ndihmën e nevojshme mjekësore dhe kanë dalë nga spitali, në gjendje të mirë shëndetësore.
Specialistët për Hetimin e Krimeve të Komisariatit të Policisë Nr. 1, në vijim të veprimeve hetimore të kryera në drejtimin e Prokurorisë së Tiranës, për këtë rast:
-arrestuan në flagrancë shtetasit K. B., 52 vjeç dhe K. P., 23 vjeçe, me detyra respektive kuzhinier dhe teknologe ushqimi në kompaninë e kontraktuar për të ofruar ushqim në Akademinë e Sigurisë;
-referuan materialet në Prokurori ku nisi procedimi në gjendje të lirë për shtetasen R. Ç., 35 vjeçe, me detyrë teknologe ushqimi në këtë kompani;
-shpallën në kërkim administratoren e kompanisë, shtetasen A. T., 52 vjeçe.
Punohet për kapjen e shtetases A. T., individualizimin dhe dokumentimin e përgjegjësisë penale të shtetasve të përfshirë në këtë rast.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprën penale “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”.
