Ambasadori i Rusisë në OKB, Vassily Nebenzia, ka mbrojtur hapur Iranin gjatë një mbledhjeje të Këshillit të Sigurimit, duke akuzuar vendet perëndimore për hipokrizi dhe duke i krahasuar ato me “piratë” për veprimet e tyre në det.
Sipas tij, Irani ka të drejtë të kufizojë lundrimin në Ngushticën e Hormuzit në kushte lufte, duke theksuar se një shtet bregdetar që është nën sulm mund të ndërmarrë masa sigurie në ujërat e tij territoriale.
Deklaratat vijnë në një moment kur ministri i Jashtëm iranian, Abbas Araghchi, ndodhet në një ofensivë diplomatike, duke u takuar në Moskë me Vladimir Putin pas vizitave në Pakistan dhe Oman. Ai konfirmoi se me Putinin diskutoi në detaje luftën dhe zhvillimet e fundit, ndërsa më herët kishte përcjellë përmes Islamabadit një listë “vijash të kuqe” për SHBA-në, përfshirë çështjen bërthamore dhe kontrollin mbi Ngushticën e Hormuzit.
Rusia dhe Kina kishin vënë më herët veton ndaj një projektrezolute në Këshillin e Sigurimit që synonte garantimin e lirisë së lundrimit në këtë korridor strategjik energjetik.
Nebenzia shkoi edhe më tej në retorikë, duke akuzuar Perëndimin për veprime të paligjshme në det dhe për mbështetje ndaj sulmeve ukrainase kundër anijeve ruse. “Ndryshe nga piratët klasikë, që ngrinin flamuj të zinj, vendet perëndimore përpiqen të fshehin veprimet e tyre pas sanksioneve,” deklaroi ai, duke e cilësuar sjelljen e BE-së si “grabitje të hapur në det”.
Në sfondin e këtyre tensioneve, tregjet globale të energjisë po reagojnë menjëherë. Çmimi i naftës Brent ka kaluar nivelin e 100 dollarëve për fuçi dhe po luhatet pranë kulmeve të tre javëve të fundit, duke reflektuar pasigurinë në një nga rrugët më të rëndësishme të furnizimit global me energji.
Përplasjet diplomatike dhe ushtarake rreth Ngushticës së Hormuzit po rrisin frikën për një krizë më të thellë energjetike, me pasoja të drejtpërdrejta për ekonominë globale.
