Një nga veprat më të famshme historike të Europës, Sixhadja e Bayeux, është ekspozuar në Londër, duke shkaktuar një interes të jashtëzakonshëm. Më shumë se 100 mijë bileta janë shitur tashmë për ekspozitën në Muzeun Britanik.
Vepra, gati 1,000-vjeçare dhe rreth 70 metra e gjatë, ka mbërritur në Britani në formën e një huazimi nga Franca, pas vitesh përpjekjesh diplomatike. Ekspozimi konsiderohet edhe një simbol i marrëdhënieve të ngushta mes Londrës dhe Parisit.
Mbreti Charles III e ka cilësuar huazimin e veprës si një “simbol të çmuar besimi” në një kohë kur, sipas tij, besimi mes kombeve duket se është gjithnjë e më i rrallë.
Sixhadja e Bayeux është një pëlhurë e qëndisur monumentale që përmes 58 skenave rrëfen pushtimin norman të Anglisë në vitin 1066, një nga ngjarjet që ndryshoi përgjithmonë historinë britanike.
Në qendër të rrëfimit është fushata e forcave normane të udhëhequra nga William Pushtuesi kundër mbretit anglez Harold Godwinson, e cila kulmoi me Betejën e Hastingsit. Një nga skenat më të njohura paraqet Haroldin të goditur në sy nga një shigjetë, megjithëse historianët modernë dyshojnë se kjo është mënyra se si ai humbi jetën.
Pushtimi norman i vitit 1066 pati pasoja të mëdha politike, kulturore dhe gjuhësore për Anglinë. Ndikimi i frëngjishtes normane u bë gjithashtu një nga elementet kryesore në formimin e gjuhës moderne angleze.
Edhe pse sot ruhet në qytetin francez të Bayeux, në Normandi, vepra besohet se është realizuar në Angli, si një rrëfim i fitores së William Pushtuesit, përpara se të dërgohej në Normandi.
Dy përpjekje të mëparshme për ta sjellë veprën në Britani kishin dështuar: e para në vitin 1953, për kurorëzimin e Mbretëreshës Elizabeth II, dhe e dyta në 1966, në 900-vjetorin e Betejës së Hastingsit.
Tashmë, pas afro një mijë vjetësh histori, publiku britanik ka mundësinë ta shohë nga afër. Sixhadja e Bayeux do të qëndrojë e ekspozuar në Muzeun Britanik në Londër deri në korrikun e ardhshëm.
