Qeveria e Berlinit ka aktivizuar një strukturë qendrore krize pasi një grup hakerësh publikoi një sasi masive të dhënash të vjedhura gjatë një sulmi kibernetik që kishte në shënjestër dy departamente të administratës së kryeqytetit gjerman.
Autoritetet njoftuan se po shqyrtojnë me intensitet maksimal materialet e publikuara për të përcaktuar përmasat e rrjedhjes së informacionit, vërtetësinë e dokumenteve dhe pasojat që sulmi mund të ketë për qytetarët dhe bizneset.
Ngjarja merr një rëndësi të veçantë edhe për shkak të momentit kur ndodh. Berlini zhvillon zgjedhjet më 20 shtator, ndërsa sulmi dhe publikimi i të dhënave ndodhin më pak se një muaj përpara votimit.
Pas sulmit qëndron grupi ransomware Rhysida, i cili kishte nxjerrë në ankand rreth 5.79 terabajt të dhëna, me një çmim fillestar prej 30 bitcoin, të vlerësuara në rreth 77,600 dollarë. Ankandi përfundoi pas disa ditësh dhe të premten materialet e vjedhura u publikuan.
Autoritetet e Berlinit kishin bërë të qartë se nuk do t’i nënshtroheshin shantazhit dhe nuk do të paguanin hakerët.
Tashmë një njësi qendrore krize do të koordinojë verifikimin dhe vlerësimin e materialeve të publikuara, si dhe procesin për identifikimin dhe njoftimin e personave apo kompanive të prekura nga rrjedhja e të dhënave.
Qeveria e Berlinit e ka cilësuar incidentin si një “krim jashtëzakonisht të rëndë” dhe një sulm ndaj vetë shtetit, ndërsa u ka kërkuar qytetarëve të mos përhapin në rrjetet sociale pretendime apo informacione të paverifikuara lidhur me përmbajtjen e materialeve të publikuara.
Personat që rezultojnë të prekur nga rrjedhja do të kontaktohen individualisht nga autoritetet përkatëse, në përputhje me rregullat gjermane dhe europiane për mbrojtjen e të dhënave personale.
Për momentin nuk është bërë publike se çfarë përmbajnë konkretisht 5.79 terabajtët e të dhënave, sa qytetarë apo biznese janë prekur dhe nëse mes materialeve ndodhen informacione veçanërisht sensitive. Pikërisht përcaktimi i këtyre përmasave është objekt i verifikimit të emergjencës që Berlini ka nisur.
