Bizneset në Mbretërinë e Bashkuar po përballen me një paradoks të pazakontë: investimi në sisteme ajri të kondicionuar për të përballuar valët gjithnjë e më të shpeshta të të nxehtit mund t’u sjellë një faturë më të lartë tatimore.
Sipas drejtuesve të sektorit të tregtisë, instalimi i kondicionerëve rrit vlerën e pronës së biznesit dhe, për pasojë, edhe takën mbi pronën tregtare (business rates) që paguajnë dyqanet.
Helen Dickinson, drejtoreshë ekzekutive e Konsorciumit Britanik të Tregtisë (BRC), tha se ndryshimet klimatike po detyrojnë bizneset të investojnë në sisteme ftohjeje dhe pajisje më efikase, por sistemi aktual tatimor i penalizon pikërisht për këto investime.
Sipas saj, bizneset nuk duhet të ndëshkohen financiarisht kur investojnë për të mbrojtur klientët, punonjësit dhe për të modernizuar ambientet.
Edhe Tom Ironside, drejtor për biznesin dhe rregullimin në BRC, shpjegoi se çdo përmirësim që rrit vlerën e një godine – përfshirë edhe instalimin e kondicionerëve – sjell automatikisht një rritje të detyrimeve tatimore.
Aktualisht, bizneset mund të përfitojnë një lehtësim të përkohshëm tatimor për investime të tilla, por ai zgjat vetëm një vit. Më pas, taksa rritet sipas vlerës së re të pronës.
Debati vjen në një kohë kur Britania po përjeton vera gjithnjë e më të nxehta dhe kërkesa për sisteme kondicionimi është rritur ndjeshëm. Nga ana tjetër, ekspertët paralajmërojnë se përdorimi masiv i tyre rrit konsumin e energjisë elektrike dhe ushtron presion mbi rrjetin energjetik.
Ndërkohë, tregtarët britanikë kërkojnë që qeveria të rishikojë sistemin aktual, duke argumentuar se investimet për përshtatjen ndaj ndryshimeve klimatike nuk duhet të shoqërohen me një barrë më të madhe fiskale.
Burimi: The Telegraph
