Të paktën gjashtë persona kanë humbur jetën dhe pesë të tjerë janë plagosur, tre prej tyre në gjendje kritike, pasi një autobus u përfshi nga flakët në Zvicër. Lajmi u konfirmua nga policia e kantonit të Freiburgut gjatë një konference për shtyp të mbajtur në mbrëmje.
Sipas autoriteteve, katër nga të plagosurit janë pasagjerë të autobusit, ndërsa personi i pestë është një ndihmës mjekësor që ndodhej në vendin e ngjarjes gjatë ndërhyrjes së shërbimeve të emergjencës.
Shkaqet e zjarrit mbeten ende të paqarta, por dyshohet se në incident mund të jetë përfshirë edhe një person, sipas raportimeve të mediave zvicerane.
Policia u ka bërë thirrje banorëve të shmangin zonën e aksidentit, ndërsa hetimet për zbardhjen e plotë të rrethanave kanë nisur menjëherë. Autoritetet po kërkojnë gjithashtu dëshmitarë që mund të kenë parë momentet e para të incidentit.
Sipas zyrtarëve, operacioni i emergjencës dhe hetimet në vendngjarje vazhduan gjatë gjithë natës.
