Sipas njoftimit të Presidentit Trump, bllokimi dhe kufizimet e kalimit të Ngushticës së Hormuzit do të zbatohen pa dallim për anijet e çdo flamuri që do dalin nga portet, terminalet e naftës ose objektet bregdetare iraniane. Kjo përfshin edhe anijet dhe ngarkesat me flamur britanik.
Autoriteti Tregtar Detar i Mbretërisë së Bashkuar (UKMTO) ka reaguar pas njoftimit amerikan në lidhje me bllokadën e Ngushticës së Hormuzit.
“UKMTO është informuar se, duke filluar nga ora 14:00 e 13 prillit 2026, po zbatohen kufizime të aksesit detar që prekin portet dhe zonat bregdetare iraniane, duke përfshirë vendet përgjatë Gjirit Arabik, Gjirit të Omanit dhe Detit Arabik në lindje të Ngushticës së Hormuzit”, thuhet në një deklaratë të këtij autoriteti britanik.
Sipas njoftimit, “këto kufizime dhe bllokada do të zbatohen pa dallim për anijet e çdo flamuri që angazhohen në portet, terminalet e naftës ose objektet bregdetare iraniane”.
UKMTO konfirmoi se kufizimet do të zbatohen për të gjithë vijën bregdetare iraniane, por nga ana tjetër tranziti përmes Ngushticës së Hormuzit për në ose nga destinacionet jo-iraniane nuk do të jetë i kufizuar. Megjithatë, anijet do të inspektohen dhe anijeve neutrale në portet iraniane do t’u mundësohet një periudhë e kufizuar kohe për t’u larguar.
Pas negociatave midis SHBA-së dhe Iranit më 11 prill, Komanda Qendrore e SHBA-së (CENTCOM) njoftoi se më 13 prill, ushtria amerikane do të fillonte një bllokadë totale detare të Iranit, duke bllokuar lëvizjen e të gjitha anijeve që drejtohen drejt porteve të vendit, si dhe atyre që do duan të largohen nga brigjet e tij.
