Në thellësitë e një kështjelle skoceze, të harruara për gati një shekull dhe dikur të konsideruara të papijshme, disa shishe vere sot renditen ndër më të rrallat dhe më të vlefshmet në botë. Dy shishe të mëdha (magnum) të verës Château Lafite 1870 do të dalin në ankand, duke tërhequr vëmendjen e koleksionistëve dhe ekspertëve të verës në mbarë globin.
Glamis Castle, një nga kështjellat më të njohura në Skoci, ka një histori të pasur dhe shpesh konsiderohet si një nga vendet më të përhumbura në vend. Ajo ka pritur figura historike si Mary Queen of Scots dhe ka lidhje të forta me familjen mbretërore britanike. Madje, besohet se ka shërbyer si frymëzim për tragjedinë “Macbeth” të William Shakespeare.
Por një nga thesaret më të pazakonta të saj ndodhej në bodrumin e verës, që një ekspert e përshkroi si një “shpellë e Aladinit”. Për dekada me radhë, aty qëndronin të fshehura shishe vere Bordeaux, të cilat më parë ishin konsideruar të papijshme. Sot, ato vlerësohen si ndër verërat më të mira dhe më të ruajtura në botë.
Dy shishet që do të dalin në ankand janë pjesë e eventit “Immortal Vintages” të organizuar nga Sotheby’s më 17 prill në Nju Jork. Ankandi përfshin mbi 250 lote verërash Bordeaux që shtrihen në dy shekuj dhe pritet të sjellë mbi 1 milion dollarë. Vetë këto dy shishe mund të arrijnë deri në 50 mijë dollarë secila.
Verërat u zbuluan rastësisht në vitet 1970 në bodrumin e kështjellës, të njohur si “katakombet”. Ato ishin pjesë e një koleksioni prej 48 shishesh të blera në vitin 1878 nga Earl-i i 13-të i Strathmore. Sipas të dhënave historike, ai nuk e kishte pëlqyer shijen e tyre, duke i konsideruar shumë të ashpra, dhe për këtë arsye ato mbetën të paprekura për dekada.
Eksperti i verërave Michael Broadbent, i cili i zbuloi ato, shkruante se verës iu deshën rreth 50 vite për t’u bërë e përshtatshme për konsum. Kur ai i provoi, ato kishin arritur një nivel të jashtëzakonshëm cilësie: ngjyra e thellë, aroma e pastër dhe një balancë e rrallë shijeje, pa asnjë shenjë oksidimi.
Sipas Richard Young, këto shishe kanë status “legjendar”, pasi janë ndër shembujt më të mirë të ruajtur të kësaj vere nga viti 1870. Ato janё edhe mё tё rralla për shkak të formatit magnum, që përmban 1.5 litra verë.
Një tjetër arsye pse këto verëra janë kaq të çmuara lidhet me historinë e prodhimit të tyre. Ato janë prodhuar përpara epidemisë së filokserës në fund të shekullit të 19-të, një insekt që shkatërroi vreshtat europiane. Pas kësaj, prodhimi i verës ndryshoi përgjithmonë, pasi rrënjët europiane u zëvendësuan me ato amerikane. Për këtë arsye, verërat si Lafite 1870 konsiderohen si një dritare drejt një stili të humbur të prodhimit të verës.
Somelieri dhe shkrimtari Jason Tesauro, i cili ka provuar këtë verë në vitin 2023, e përshkruan përvojën si të paharrueshme. Ai tregon se aroma e frutave ishte ende e pranishme, një gjë e jashtëzakonshme për një verë kaq të vjetër. “Nuk ishin thjesht gjurmë apo hije shijesh – ishte një përvojë e plotë,” tha ai, duke e krahasuar me bukurinë e përjetshme të Sophia Loren në moshë të thyer.
Ankandi pritet të tërheqë dy lloje blerësish: koleksionistë që do ta ruajnë verën si një objekt unik dhe entuziastë që duan të përjetojnë një copë historie – shijen e vitit 1870.
Në fund, ajo që dikur u la mënjanë si e papijshme, sot është kthyer në një nga thesaret më të rralla të botës së verës – një histori që lidh kohën, rastësinë dhe vlerën që vetëm vitet mund ta krijojnë.
(Burimi: CNN)
