Një lëvizje që nisi si satirë në rrjetet sociale është shndërruar në një nga protestat më të pazakonta dhe më të zhurmshme të rinisë indiane.
Prej disa ditësh, qindra të rinj janë mbledhur në qendër të Nju Delhit duke kërkuar dorëheqjen e ministrit të Arsimit, Dharmendra Pradhan, pas një sërë skandalesh që kanë përfshirë sistemin kombëtar të provimeve. Në krye të protestës qëndron 30-vjeçari Abhijeet Dipke, themeluesi i lëvizjes satirike “Cockroach Janta Party” (Partia e Buburrecave), e cila brenda pak javësh është kthyer në simbol të revoltës së brezit të ri.
“Do të qëndrojmë këtu sa të jetë e nevojshme. Nuk largohemi derisa ministri të japë dorëheqjen,” deklaroi Dipke.
Lëvizja u krijua vetëm një muaj më parë, si një reagim ironik ndaj komenteve të kryetarit të Gjykatës së Lartë të Indisë, të cilat u interpretuan nga shumë të rinj si krahasim i të papunëve me “buburrecat”. Aktivistët e përvetësuan këtë etiketim dhe e kthyen në simbol proteste, duke krijuar një emër që luan edhe me inicialet e partisë në pushtet të kryeministrit Narendra Modi, Bharatiya Janata Party (BJP).
Ajo që fillimisht ishte një seri memesh në internet është kthyer tashmë në një kamp protestues të përhershëm në monumentin historik Jantar Mantar, ku çdo ditë mblidhen qindra studentë dhe të rinj.
Protestuesit kanë zgjedhur forma kreative për të shprehur revoltën e tyre. Njё ditë ata u shpërndanë trëndafila policëve për të ruajtur karakterin paqësor të protestës, ndërsa një ditё tjetër goditën pjata metalike, duke ironizuar thirrjen e kryeministrit Modi gjatë pandemisë së COVID-19, kur qytetarëve u kërkohej të bënin zhurmë nga ballkonet.
Një nga protestat më simbolike ishte ajo ku pjesëmarrësit sollën pelena dhe mbi to shkruan kërkesat për dorëheqjen e ministrit të Arsimit.
“Pelena është simboli i rrjedhjeve të vazhdueshme të tezave të provimeve. Në Indi pothuajse nuk ka më një provim shtetëror që të mos përfundojë në skandal,” tha Dipke.
Në Indi, provimet kombëtare janë vendimtare për të ardhmen e miliona të rinjve. Çdo vit, miliona kandidatë konkurrojnë për një numër shumë të kufizuar vendesh në universitetet më prestigjioze dhe në institucionet publike, ku edhe një diferencë minimale pikësh mund të përcaktojë të gjithë karrierën e tyre.
Por sistemi është përballur vazhdimisht me akuza për rrjedhje të tezave, manipulime dhe probleme teknike.
Skandali më i fundit shpërtheu muajin e kaluar, kur rezultatet e mbi dy milionë kandidatëve që kishin zhvilluar provimin kombëtar për pranimin në fakultetet e mjekësisë u anuluan pas dyshimeve për publikimin e paligjshëm të tezës.
Presioni psikologjik mbi studentët është bërë gjithashtu objekt debati. Mediat indiane kanë raportuar gjatë javëve të fundit disa raste vetëvrasjesh që dyshohet se lidhen me stresin ekstrem të provimeve. Në shenjë kujtimi për këta studentë, protestuesit ndezën qirinj gjatë manifestimit.
Ministri i Arsimit i ka cilësuar protestuesit si “krahu B i grupeve terroriste”, një deklaratë që ka nxitur reagime të forta.
Dipke e hodhi poshtë këtë akuzë, duke theksuar se lëvizja kërkon vetëm drejtësi dhe reformimin e sistemit arsimor.
“Në vend që të marrë përgjegjësi morale për dështimin e sistemit, ministri na etiketon si terroristë. Kjo është tragjike,” u shpreh ai.
Autoritetet kanë shtuar masat e sigurisë për zhvillimin e provimeve të reja, duke përdorur madje edhe avionë ushtarakë për transportimin e tezave, ndërsa kampi i protestuesve vazhdon të furnizohet çdo ditë me ushqime, ujë dhe ndihma nga vullnetarë.
Sipas organizatorëve, lëvizja është ende në fazat e para, por synon të krijojë një strukturë kombëtare në disa shtete të Indisë.
Objektivi i saj nuk është vetëm largimi i ministrit të Arsimit, por një reformë e thellë e sistemit të provimeve, të cilin protestuesit e konsiderojnë të korruptuar, të padrejtë dhe shkatërrues për brezin e ri.
Ajo që nisi si një meme në internet po kthehet dalëngadalë në një lëvizje qytetare, duke dëshmuar se pakënaqësia e akumuluar e të rinjve indianë për papunësinë, mungesën e meritokracisë dhe skandalet në arsim po del tashmë nga rrjetet sociale dhe po pushton rrugët.
Burimi: CNN
