Sistemi francez i financave publike është goditur nga një sulm kibernetik, i cili mund të ketë ekspozuar të dhënat personale dhe tatimore të miliona qytetarëve dhe bizneseve.
Ministria franceze e Ekonomisë konfirmoi se objektiv i sulmit ka qenë Drejtoria e Përgjithshme e Financave Publike (DGFiP), institucioni përgjegjës ndër të tjera për administrimin e taksave në Francë.
Sipas të dhënave të raportuara, një person i paautorizuar dyshohet se ka arritur të hyjë në sistem në fund të muajit qershor, pasi kishte vjedhur identitetin e një personi tjetër.
Hetimet paraprake tregojnë se sulmuesi ka komprometuar një rrjet të brendshëm virtual privat, VPN, dhe përmes tij ka mundur të përdorë një mjet kërkimi për të dhënat e tatimpaguesve. Gjatë kësaj kohe ai dyshohet se ka pasur mundësi jo vetëm t’i shohë të dhënat, por edhe t’i nxjerrë ato nga sistemi.
Aksesi i paautorizuar u zbulua dhe u bllokua gjatë një kontrolli të brendshëm në fund të qershorit.
Ende nuk dihet saktësisht sa persona janë prekur, por sipas raportimeve, bëhet fjalë potencialisht për miliona përdorues.
Mes informacioneve që mund të jenë ekspozuar përfshihen emrat, të dhënat e lindjes, adresat e banimit, numrat e telefonit, adresat e emailit, numrat e identifikimit tatimor, normat e tatimit të mbajtur në burim, si dhe komunikimet e qytetarëve me administratën tatimore. Për bizneset mund të jenë komprometuar edhe numrat e regjistrimit.
Megjithatë, Ministria e Ekonomisë nuk ka konfirmuar ende listën përfundimtare të të dhënave të prekura. Sipas informacionit të deritanishëm, emrat e përdoruesve dhe fjalëkalimet nuk rezultojnë të jenë ekspozuar.
Autoritetet franceze po vazhdojnë hetimet për të përcaktuar përmasat reale të sulmit, mënyrën se si është realizuar dhe numrin e personave të prekur.
Për incidentin është njoftuar gjithashtu CNIL, autoriteti francez përgjegjës për mbrojtjen e të dhënave personale.
