Manchester City ёshtё gjetur nё shkelje tё pothuajse të gjitha rregullave financiare të Premier League për të cilat ishte akuzuar, ndërsa vendimi për sanksionet ndaj klubit ende nuk është marrë.
Paneli i pavarur që shqyrtoi çështjen e ka gjetur City-n fajtor për të gjitha akuzat përveç njërës. Premier League nuk ka komentuar mbi raportimin, ndërsa Manchester City deklaroi se procesi “vazhdon ende, me elemente të rëndësishme që duhet të përfundojnë” dhe se çështja mbetet konfidenciale.
Klubi ka mohuar vazhdimisht akuzat dhe ka deklaruar se disponon një “tërësi gjithëpërfshirëse provash të pakundërshtueshme” në mbështetje të pozicionit të tij. Në rast të një vendimi përfundimtar fajësie, Manchester City pritet ta apelojë atë.
Çështja nisi në shkurt 2023, kur kampionët anglezë u akuzuan për më shumë se 100 shkelje pas një hetimi katërvjeçar. Akuzat lidhen kryesisht me periudhën 2009-2018 dhe përfshijnë pretendime për mosdhënie të informacionit të saktë financiar, të dhëna jo të plota mbi pagesat e lojtarëve dhe trajnerëve, shkelje të rregullave të UEFA-s dhe të qëndrueshmërisë financiare të Premier League, si dhe mosbashkëpunim me hetimin.
Në total, dosja e njohur gjerësisht si çështja e “115 akuzave” përfshin 54 akuza për mosdhënie të informacionit të saktë financiar, 14 për të dhënat mbi pagesat e lojtarëve dhe trajnerëve, pesë për shkelje të rregullave të UEFA-s, përfshirë Financial Fair Play, shtatë për shkeljen e rregullave të fitueshmërisë dhe qëndrueshmërisë së Premier League dhe 35 për mosbashkëpunim me hetimin.
Seanca përpara komisionit të pavarur nisi me dyer të mbyllura në shtator 2024 dhe përfundoi në dhjetor të atij viti, pas rreth 12 javësh shqyrtimi.
Periudha e hetuar përkon me një prej etapave më të suksesshme të klubit. Manchester City fitoi tetë trofe, përfshirë tre tituj të Premier League, gjatë viteve që mbulohen nga akuzat.
Tani vëmendja zhvendoset te sanksioni që mund të vendoset ndaj klubit. Klube të tjera të Premier League ndërkohë besohet se janë informuar për vendimin e panelit dhe kanë kërkuar këshillim juridik për të parë nëse mund të kërkojnë kompensim.
