Një grua britanike mbeti e tronditur pasi zbuloi se fqinji i saj, të cilit i kishte besuar çelësat e shtëpisë, kishte vendosur fshehurazi pajisje përgjimi brenda banesës së saj.
Debbie Wearing, nga Britania e Madhe, kishte lënë çelësin e shtëpisë tek fqinjët e saj, William Nolan dhe bashkëshortja e tij, në vitin 2020, në mënyrë që ata të ushqenin macet ndërsa ajo ishte me pushime.
Por disa muaj më vonë, gjatë një darke në shtëpi, ajo vuri re një objekt të vogël të ngjitur poshtë tavolinës. Fillimisht mendoi se ishte një lodër e nipit të saj, por pasi kërkoi informacion, zbuloi se bëhej fjalë për një pajisje regjistrimi.
E alarmuar, ajo kontrolloi pjesë të tjera të banesës dhe gjeti një tjetër pajisje të fshehur pas krevatit në dhomën e gjumit.
Sipas raportimeve të mediave britanike, gruaja njoftoi policinë, por për të siguruar prova më të forta vendosi të instalonte vetë kamera sigurie në shtëpi. Ajo i tha fqinjës se do të largohej për pak kohë dhe priti.
Rreth 30 minuta pasi doli nga banesa, kamerat filmuan William Nolan duke hyrë në shtëpi dhe duke kërkuar me nxitim pajisjet e fshehura.
Wearing tha se Nolan kishte filluar të afrohej më shumë me të pas vdekjes së bashkëshortit të saj në vitin 2019. Në vitin 2021, ai pranoi fajësinë për përndjekje dhe u dënua me burg. Ai ndërroi jetë në vitin 2024.
Megjithatë, gruaja tha se nuk arriti të ndihej sërish e sigurt derisa u largua përfundimisht nga ajo shtëpi.
“Kur gjeta pajisjet e përgjimit, u ndjeva totalisht e dhunuar. Ai merrej me kamera sigurie dhe sisteme mbikëqyrjeje, ndaj kjo e bënte edhe më të frikshme”, deklaroi ajo për mediat britanike.
Ajo tregoi se kishte filluar të jetonte me frikë edhe për gjëra të zakonshme.
“Nuk ndihesha rehat as të nxirrja rrobat në oborr. Vetë ideja që ai mund të më shikonte ishte e tmerrshme”, tha ajo.
Sipas saj, vendosja e një pajisjeje përgjimi pranë krevatit kishte vetëm një shpjegim.
“Për mua, kur dikush vendos një pajisje regjistrimi tek krevati yt, ka vetëm një arsye: një arsye seksuale. Vetëm një pervers do ta bënte këtë”, u shpreh ajo.
Rasti ka rikthyer në vëmendje problemin e përndjekjes dhe përgjimit të fshehtë, sidomos nga persona të njohur për viktimat. Sipas organizatave amerikane kundër pёrndjekjes, miliona persona bien viktimë çdo vit e shpesh agresori është dikush që viktima e njeh dhe i beson.
(Burimi: littlethings)
