Një akt i pazakontë dhe me peshë simbolike ka ardhur nga Franca, ku një 86-vjeçar ka kërkuar publikisht falje për rolin e familjes së tij në skllavërinë transatlantike – një gjest që besohet të jetë i pari i këtij lloji në vend.
Pierre Guillon de Prince, pasardhës i një familjeje tregtarësh skllevërish me bazë në portin e Nantes, pranoi publikisht të kaluarën e paraardhësve të tij, të cilët transportuan rreth 4,500 afrikanë të skllavëruar dhe zotëronin plantacione në Karaibe.
Falja u bë gjatë një tubimi në Nantes, një qytet historikisht i lidhur ngushtë me tregtinë e skllevërve, ku ai u shfaq krah për krah me Dieudonné Boutrin, pasardhës i skllevërve nga Martinika. Të dy janë pjesë e një organizate që synon të thyejë heshtjen mbi këtë kapitull të errët të historisë.
“Ndjeva përgjegjësinë të mos lejoja që kjo e kaluar të fshihej”, deklaroi Guillon de Prince, duke lidhur gjestin e tij me rritjen e racizmit dhe tensioneve sociale në ditët e sotme.
Ai nuk u ndal vetëm te falja personale. 86-vjeçari bëri thirrje që edhe familje të tjera franceze të përballen me të shkuarën e tyre dhe që shteti të shkojë përtej gjesteve simbolike, duke hapur diskutimin për dëmshpërblimet.
Nga shekulli i 15-të deri në të 19-in, mbi 12.5 milionë afrikanë u rrëmbyen dhe u transportuan me forcë drejt Amerikёs. Vetëm Franca është përgjegjëse për rreth 1.3 milionë prej tyre. Megjithatë, ndonëse në vitin 2001 e njohu skllavërinë si krim kundër njerëzimit, shteti francez nuk ka kërkuar kurrë një falje zyrtare.
Në vitet e fundit janë bërë disa hapa drejt përballjes me të kaluarën, si hapja e arkivave koloniale apo nisma për të studiuar historinë me Haitin. Por çështja e përgjegjësisë dhe e kompensimeve mbetet ende e ndjeshme dhe e pazgjidhur.
Në këtë kontekst, gjesti i një individi të vetëm merr një peshë më të madhe se sa duket. Ai nuk ndryshon historinë, por sfidon heshtjen që e ka shoqëruar atë për dekada.
(Burimi: The Guardian)
