Republika Demokratike e Kongos ka pranuar grupin e parë të emigrantëve të dëbuar nga Shtetet e Bashkuara, duke hyrë kështu në një skemë të diskutueshme ku persona që nuk janë as amerikanë dhe as kongolezë transferohen në vende të treta.
Bëhet fjalë për 15 persona që mbërritën në orët e para të së premtes në aeroportin ndërkombëtar të N’djili në Kinshasa. Sipas burimeve lokale, shumica e tyre janë nga Amerika Latine, kryesisht nga Kolumbia dhe Peruja.
Autoritetet kongoleze theksuan se qëndrimi i tyre do të jetë i përkohshëm dhe se e gjithë kostoja e pritjes, akomodimit dhe kujdesit po mbulohet nga SHBA-të. Qeveria e Kinshasës e paraqiti vendimin si pjesë të angazhimit për të drejtat e njeriut dhe solidaritetin ndërkombëtar, duke insistuar se nuk bëhet fjalë për një mekanizëm të përhershëm zhvendosjeje.
Nga ana tjetër, Uashingtoni nuk ka dhënë shumë detaje mbi marrëveshjet konkrete, por ka përsëritur qëndrimin e tij për të forcuar kontrollin ndaj emigracionit të paligjshëm. Kjo praktikë nuk është e re: SHBA-të kanë dërguar tashmë emigrantë të dëbuar edhe në vende të tjera si Gana, Sudani i Jugut dhe Eswatini.
Megjithatë, kjo qasje ka ngritur pikëpyetje të forta. Transferimi i emigrantëve në vende të treta, shpesh larg rajoneve të tyre të origjinës, shihet nga kritikët si një formë “nёnkontraktimi” pёr zbatimin e politikave të emigracionit, ku barrën e menaxhimit e marrin shtete që nuk kanë lidhje direkte me këta individë.
Raporte nga Senati amerikan sugjerojnë se deri në fillim të vitit 2026, SHBA-të mund të kenë shpenzuar mbi 40 milionë dollarë për këto operacione, ndërsa shuma totale mbetet e paqartë.
Në sfond të kësaj marrëveshjeje qëndrojnë edhe interesa më të gjera gjeopolitike. SHBA-të janë në negociata me Republikën Demokratike të Kongos për akses në burimet e saj të pasura minerare, përfshirë kobaltin dhe litiumin – materiale kyçe për industrinë globale të teknologjisë.
Ndërsa autoritetet e paraqesin këtë si një marrëveshje praktike dhe të përkohshme, tё gjithё po ngrenё njё pyetje: a po kthehen vendet më të brishta në destinacione të reja për problemet e emigracionit global?
(Burimi: BBC)
