Përplasja mes Vatikanit dhe Donald Trump po merr përmasa të pazakonta, me tone që rrallë janë dëgjuar mes një presidenti amerikan dhe Selisë së Shenjtë.
Pas sulmeve të përsëritura të Trump ndaj Papës, Ati i Shenjtë zgjodhi të mos kundërpërgjigjet me të njëjtën gjuhë politike, por me një mesazh që dukej si përgjigje direkte ndaj Shtëpisë së Bardhë: “Misioni i Kishës është të predikojë Ungjillin, të predikojë paqen”.
Deklarata e Papёs erdhi ndërsa tensionet mes SHBA-ve, Izraelit dhe Iranit vazhdojnë të mbajnë Lindjen e Mesme në prag shpërthimi.
Papa ka kundërshtuar publikisht luftën dhe ka bërë vazhdimisht thirrje për dialog e paqe, duke deklaruar muajin e kaluar: “Si pastor, nuk mund të jem pro luftës”.
Por kjo linjë ka irrituar Trumpin, i cili ka sulmuar vazhdimisht Papën në rrjetet sociale dhe intervista publike.
Këtë javë, presidenti amerikan deklaroi se Papa “po rrezikon shumë katolikë” sepse “mendon se është në rregull që Irani të ketë armë bërthamore”.
Në fakt, Papa nuk ka mbështetur kurrë një Iran bërthamor. Ai ka kritikuar luftën dhe përshkallëzimin ushtarak, duke kërkuar zgjidhje diplomatike.
Megjithatë, përplasja tashmë duket se ka kaluar kufijtë e debatit politik dhe ka hyrë në territor personal e simbolik.
Trump shkroi se Papa “nuk ishte në asnjë listë për t’u bërë Papë” dhe pretendoi se zgjedhja e tij ishte bërë sepse Kisha mendonte se “kjo ishte mënyra më e mirë për t’u marrë me Donald Trump”.
Madje presidenti amerikan shtoi: “Nëse unë nuk do të isha në Shtëpinë e Bardhë, Leo nuk do të ishte në Vatikan”.
Marco Rubio ndodhet në Itali dhe Vatikan për një vizitë dyditore, ku pritet të diskutojë konfliktin në Lindjen e Mesme dhe marrëdhëniet me Selinë e Shenjtë.
Rubio mohoi se udhëtimi kishte si qëllim zbutjen e krizës mes Trump dhe Papës, por pranoi se “ka shumë gjëra për të diskutuar me Vatikanin”.
Edhe ambasadori amerikan në Selinë e Shenjtë, Brian Burch, tentoi të minimizojë situatën duke deklaruar se nuk ekziston “asnjë përçarje e thellë”.
Por realiteti politik tregon të kundërtën.
Për herë të parë pas shumë vitesh, një Papë amerikan po përplaset hapur me një president amerikan – dhe jo për çështje doktrinare, por për luftën, diplomacinë dhe mënyrën si konceptohet morali në politikën globale.
Në këtë përballje, Trump flet me gjuhën e forcës dhe presionit ushtarak.
Papa përgjigjet me një fjali të vetme: “Misioni ynë është të predikojmë paqen.”
