Një gjykatës federal në SHBA ka urdhëruar publikimin e një dokumenti që pretendohet se është shkruar me dorë nga Jeffrey Epstein vetëm një muaj përpara se ai të gjendej i vdekur në qelinë e tij në vitin 2019.
Dokumenti, i zbuluar këtë javë nga një gjykatë federale në White Plains, konsiderohet nga autoritetet si një shënim i mundshëm vetëvrasjeje dhe përmban disa fjali të shkurtra, të errëta dhe emocionalisht të ngarkuara.
Në një prej rreshtave, Epstein shkruan: “Më hetuan për një muaj – NUK GJETËN ASGJË!!!”, ndërsa më tej shton: “Është kënaqësi të jesh në gjendje të zgjedhësh kohën për të thënë lamtumirë”.
Në dokument përfshihet edhe një tjetër fjali enigmatike: “Çfarëdo që të bëj – shpërthej duke qarë!! PA ARGËTIM – NUK IA VLEN.”
Shënimi përbëhet vetëm nga shtatë rreshta dhe nuk jep shpjegime të drejtpërdrejta mbi gjendjen mendore të Epstein apo arsyet e mundshme të vetëvrasjes së tij, duke lënë hapësirë për interpretime dhe spekulime të reja.
Dokumenti u bë publik pas një urdhri të gjyqtarit federal Kenneth M. Karas, i cili argumentoi se interesi publik për transparencë ishte më i fortë sesa arsyet për ta mbajtur dokumentin të vulosur.
“Publiku duhet të ketë besim në administrimin e drejtësisë”, shkroi gjyqtari në vendimin e tij, duke theksuar se dokumenti tashmë ishte diskutuar publikisht në media dhe podkaste.
Shënimi u gjet, sipas pretendimeve, nga ish-shoku i qelisë së Epstein, Nicholas Tartaglione, një ish-polic amerikan i dënuar për katër vrasje, i cili ndodhej në të njëjtën njësi paraburgimi me Epstein në verën e vitit 2019.
Tartaglione ka deklaruar se e zbuloi shënimin të fshehur brenda një libri, pasi Epstein kishte tentuar të vriste veten në korrik 2019, një muaj përpara se të gjendej i varur në qelinë e tij në burgun federal të Manhattanit.
Vdekja e Epstein vazhdon të mbetet një nga ngjarjet më të debatuara në SHBA, jo vetëm për shkak të rrjetit të tij të fuqishëm të kontakteve politike, financiare dhe mediatike, por edhe për shkak të dështimeve serioze të sigurisë në burg natën kur ai vdiq.
Autoritetet amerikane e klasifikuan vdekjen si vetëvrasje, por rasti ka prodhuar prej vitesh teori konspirative dhe dyshime publike mbi mënyrën se si një nga të burgosurit më të famshëm në botë arriti të vdiste nën mbikëqyrje federale.
Në momentin e vdekjes, Epstein priste gjyqin për akuza të rënda të trafikimit seksual të vajzave të mitura. Skandali çoi në hetime ndërkombëtare dhe ekspozoi lidhje të tij me figura të njohura politike, biznesi dhe showbiz-i në SHBA dhe Europë.
Edhe Departamenti Amerikan i Drejtësisë deklaroi se nuk kishte më arsye për ta mbajtur sekret dokumentin, duke mbështetur publikimin e tij në gjykatë.
Publikimi i shënimit pritet të rikthejë sërish debatin mbi misterin Epstein, në një kohë kur dosjet dhe lidhjet e tij vazhdojnë të prodhojnë tronditje politike dhe mediatike në SHBA.
