Një tjetër kthesë e papritur nga Donald Trump po trondit balancat e sigurisë në Europë. Shtetet e Bashkuara pritet të heqin dorë nga plani për vendosjen e armëve me rreze të gjatë veprimi në Gjermani, përfshirë raketat e njohura Tomahawk — një zhvillim që ngre pikëpyetje serioze për mbrojtjen e aleatëve.
Sipas Financial Times, që citon një zyrtar të Pentagonit, administrata amerikane po rishikon planet e mëparshme që parashikonin vendosjen e këtyre kapaciteteve strategjike në territorin gjerman deri në vitin 2027. Marrëveshja ishte arritur në vitin 2025 gjatë administratës së Joe Biden, si pjesë e përpjekjeve për të forcuar krahun lindor të NATO-s.
Por ndryshimi i kursit në Uashington duket se po krijon shqetësim në qarqet e sigurisë. Sipas analistit Christian Moelling, tërheqja e trupave amerikane është një çështje e menaxhueshme, por heqja dorë nga kapacitetet e goditjes në distancë është shumë më problematike.
“Për trupat mund të gjejmë zgjidhje alternative, por për goditjet me rreze të gjatë kemi një boshllëk real,” paralajmëroi ai, duke shtuar se një vendim i tillë vë në pikëpyetje gatishmërinë e SHBA-së për të mbrojtur aleatët e saj në NATO.
Ky zhvillim vjen në një moment të tensionuar në marrëdhëniet transatlantike. Pak ditë më parë, Trump njoftoi edhe një tërheqje të pjesshme të trupave amerikane nga Gjermania — një vendim që pasoi kritikat e Friedrich Merz ndaj politikës amerikane në konfliktin me Iranin.
Në këtë kontekst, anulimi i një elementi kyç të mbrojtjes strategjike shihet jo vetëm si një rishikim ushtarak, por si një sinjal politik. Ai forcon perceptimin se SHBA po rikonfiguron rolin e saj në Europë, duke lënë më shumë përgjegjësi në duart e vetë aleatëve.
Për Gjermaninë dhe vendet e tjera europiane, dilema bëhet gjithnjë e më e qartë: sa mund të mbështeten ende tek garancitë amerikane në një kohë kur vendimet strategjike po ndryshojnë me ritme të shpejta?
(Burimi: TASS; Financial Times)
