Një vendim i Komisionit Europian ka shkaktuar reagime të forta mes punonjësve të institucionit, pasi sistemi i ajrit të kondicionuar u fik në katet e poshtme të selisë qendrore në Bruksel, ndërsa zyrat e presidentes Ursula von der Leyen dhe shumicës së komisionerëve vazhduan të furnizoheshin normalisht me ftohje.
Sipas një raportimi të Politico, ndërtesa 13-katëshe “Berlaymont”, ku ndodhen zyrat e Presidentes së Komisionit Europian, Ursula von der Leyen, 26 komisionerëve dhe rreth 3.000 punonjësve, aplikoi masa të ndryshme për stafin gjatë valës ekstreme të të nxehtit që ka përfshirë Belgjikën.
Zyra e Von der Leyen, e vendosur në katin e 13-të, nuk u prek nga ndërprerja, ndërsa edhe shumica e zyrave të komisionerëve, të vendosura nga kati i tetë e lart, vijuan të kenë ajër të kondicionuar.
Ndërkohë, punonjësit që punojnë në katet nga i pari deri në të shtatin morën rreth mesditës një mesazh urgjent ku njoftoheshin se sistemi i ftohjes do të fikhej për pjesën e mbetur të ditës për shkak të temperaturave ekstreme.
Vetëm pak ditë më parë, Komisioni Europian kishte këshilluar stafin të shmangte daljet jashtë gjatë orëve më të nxehta, të pinte sa më shumë ujë dhe të fillonte punën më herët në mëngjes për të reduktuar ekspozimin ndaj vapës.
Vendimi për të fikur kondicionerët vetëm në katet e poshtme shkaktoi pakënaqësi të madhe mes punonjësve.
“Është si feudalizëm”, deklaroi një zyrtar i Komisionit për Politico, duke iu referuar faktit se katet ku ndodhen komisionerët vazhduan të kishin ajër të kondicionuar. Një tjetër punonjës e cilësoi situatën “një turp”.
Edhe në katet ku sistemi i ftohjes vazhdoi të funksiononte, temperaturat mbetën të larta. Një punonjës raportoi se temperatura brenda zyrës kishte arritur në 25.7 gradë Celsius.
Vala e të nxehtit ka rikthyer debatin mbi mungesën e sistemeve të kondicionimit në shumë vende të Evropës. Sipas raportimit, vetëm rreth një në pesë familje evropiane disponon kondicioner.
Problemet nuk kufizohen vetëm te ndërtesat publike. Rreth 20% e trenave në Belgjikë nuk janë të pajisur me sisteme ftohjeje, çka ka detyruar operatorin kombëtar hekurudhor të anulojë disa shërbime gjatë orëve të pikut.
Edhe Parlamenti Europian është përballur këtë javë me ndërprerje të energjisë elektrike, pasi kërkesa e lartë për energji nga sistemet e ftohjes ka vënë nën presion rrjetin elektrik.
Burimi: AA
