Ekuadori shkroi një nga historitë më të bukura të Botërorit 2026, duke mposhtur Gjermaninë 2-1 dhe duke siguruar një vend në fazën me eliminim direkt, mes lotëve të gëzimit të mijëra tifozëve në stadium dhe miliona të tjerëve në vend.
Skuadra amerikano-jugore hyri në ndeshjen e fundit të Grupit E me vetëm një pikë në dy takimet e para dhe kishte nevojë patjetër për fitore për të mbajtur gjallë ëndrrën e kualifikimit.
Gjermania, që e kishte siguruar tashmë vendin e parë në grup, kaloi e para në avantazh me Leroy Sané. Goli erdhi mes polemikave, pasi futbollistët e Ekuadorit protestuan ashpër për një faull të padhënë më herët në aksion, kur Aleksandar Pavloviç goditi me këmbë në kokë Pedro Vite.
Megjithatë, Ekuadori nuk u dorëzua. Vetëm shtatë minuta më vonë, Nilson Angulo, sulmuesi i Sunderlandit, riktheu baraspeshën me një goditje të bukur nga distanca, duke mposhtur Manuel Neuer.
Në pjesën e dytë, Gjermania kërkoi sërish avantazhin. Kai Havertz fitoi fillimisht një penallti, por pas ndërhyrjes së VAR-it vendimi u anulua, pasi u konstatua një faull i Leroy Sané në nisje të aksionit.
Trajneri Julian Nagelsmann hodhi në fushë Deniz Undav, heroin e ndeshjes së kaluar ndaj Bregut të Fildishtë, ndërsa Gjermania krijoi disa raste të mira, por portieri Hernán Galíndez dhe mbrojtja ekuadoriane rezistuan.
Në anën tjetër, Ekuadori nisi të besonte gjithnjë e më shumë. Enner Valencia detyroi Neuerin të bënte një pritje vendimtare, ndërsa Kevin Rodríguez iu afrua golit pas një keqkuptimi mes portierit gjerman dhe Jonathan Tah.
Kur dukej se gjithçka do të mbyllej në barazim, erdhi momenti historik. Në minutën e 77-të, pas një goditjeje nga këndi, Kevin Rodríguez devijoi topin me kokë dhe Gonzalo Plata u gjend në vendin e duhur për ta shtyrë në rrjetë nga fare pranë portës.
Goli shpërtheu në festë tribunat e stadiumit në Nju Xhersi, ku dominonin tifozët ekuadorianë. Në fund të takimit, lotët e gëzimit pushtuan futbollistët dhe mbështetësit, ndërsa Ekuadori siguroi për herë të dytë në histori kualifikimin në fazën me eliminim direkt të një Kampionati Botëror.
Nga ana tjetër, Gjermania pësoi humbjen e parë pas 11 fitoreve radhazi, megjithëse ruajti vendin e parë në grup dhe do të udhëtojë drejt raundit të 32 skuadrave si favorite.
Për Ekuadorin, megjithatë, kjo ishte shumë më tepër se një fitore. Ishte një mbrëmje që do të mbetet gjatë në kujtesën e një kombi të tërë, i cili pa skuadrën e tij të sfidonte një nga gjigantët e futbollit botëror dhe të vazhdonte ëndrrën në Botërorin 2026.
