Një histori familjare e vendosur mes konfliktit, kujtesës dhe ndryshimeve të shoqërisë vjen në skenën e teatriyt përmes shfaqjes “Muzg në kopshtin e qershive”, me regji të Driada Dervishit.
E mbështetur në veprat e shkrimtarit rus Anton Çehov dhe dramaturges amerikane Lillian Hellman, shfaqja sjell një histori që prek tema të afërta me realitetin e sotëm. Në qendër të saj është një projekt për ndërtimin e një resorti në një kopsht me qershi, i cili përplas anëtarët e një familjeje dhe rikthen në sipërfaqe konfliktet e së kaluarës.
Ndërsa të rriturit përballen me çështjet e pronës, interesat ekonomike dhe fitimet që mund të sjellë projekti, një prej zërave më të rëndësishëm vjen nga vajza e familjes. Ajo ngre pyetjen se çfarë do të mbetet pasi pemët të priten dhe gjithçka e njohur të ndryshojë.
Aktorja Alesia Xhemalaj, e cila interpreton vajzën e shtëpisë, e sheh historinë si një pasqyrim të problemeve që shfaqen brenda familjeve dhe shoqërisë.
“Është e gjithë çfarë ndodh në familje, të gjitha dramat sociale që ndodhin sot. Të gjitha problemet, fëmija i shtëpisë i përjeton shumë”, u shpreh ajo.
Për aktorin Neritan Liçaj, shfaqja trajton edhe pasojat e shpërbërjes së familjes dhe mënyrën se si problemet e shoqërisë ndikojnë te brezi i ri.
“Këta janë njerëz që nuk kanë skrupuj, edhe fëmijën e mësojnë gangster dhe hajdut. Kjo shfaqje ka mesazhe shumë të forta dhe është ajo që teatri duhet të bëjë, është një pasqyrë që ne i vëmë publikut”, deklaroi Liçaj.
Përtej konfliktit familjar, “Muzg në kopshtin e qershive” sjell në skenë çështje që lidhen me ndryshimin, humbjen, kujtesën dhe përplasjen mes zhvillimit dhe ruajtjes së trashëgimisë.
Aktori Laert Vasili e lidh këtë ide me nevojën për të mos humbur kujtesën gjatë proceseve të ndryshimit shoqëror.
“Kujtimet nuk janë për shitje’ na tregon se në këtë tranzicion që po kalon shoqëria jonë, ne duhet të shkojmë duke mbartur ato kujtime të vegjëlisë. Mund të ketë zhvillim, por duke ruajtur atë që me shekuj na erdhi deri më sot”, tha Vasili.
Përmes historisë së një familjeje dhe fatit të një kopshti me qershi, shfaqja vendos përballë të shkuarën dhe të ardhmen, duke ngritur pyetje mbi atë që humbet në emër të ndryshimit.
“Muzg në kopshtin e qershive” do të vijojë të shfaqet për publikun edhe gjatë muajit tetor.
