Polonia e konsideron akt sabotimi zjarrin që shpërtheu në një stacion Starlink në pjesën qendrore të vendit, ndërsa autoritetet dyshojnë se objektivi ishte ndërprerja e lidhjes së internetit që përdoret edhe nga ushtria ukrainase.
Zëvendëskryeministri dhe ministri polak i Digjitalizimit, Krzysztof Gawkowski, deklaroi se zjarri shpërtheu në mbrëmje në një stacion që i përket kompanisë shtetërore të telekomunikacionit Exatel.
“Ky akt sabotimi ishte projektuar qëllimisht për të nxjerrë jashtë funksionit stacionin”, deklaroi Gawkowski, duke shtuar se synimi ishte ndërprerja e internetit për institucione të ndryshme, përfshirë ushtrinë ukrainase.
Stacioni përdoret për transmetimin e trafikut të internetit përmes territorit polak, përfshirë lidhjet drejt Ukrainës fqinje. Sipas zëvendëskryeministrit, ka “shumë tregues” se incidenti mund të jetë pjesë e një faze të re të luftës hibride dhe se përputhet me atë që ai e cilësoi si një “doktrinë të re ruse të sulmit”.
Polonia dhe vende të tjera të BE-së dhe NATO-s e kanë akuzuar më parë Moskën për operacione hibride dhe akte sabotimi kundër vendeve që mbështesin Ukrainën, akuza që janë shtuar që prej nisjes së pushtimit të plotë rus të Ukrainës në vitin 2022.
Polonia, e cila kufizohet me Ukrainën, Bjellorusinë dhe enklavën ruse të Kaliningradit, është një nga mbështetëset kryesore europiane të Kievit.
